• თბილისი
  • 18°C
  • 12 ნოემბერი, 2019
article

"იმ ქალს, მოკლულ გოგონას რომ ჭკუას ასწავლის, ოდესღაც აუცილებლად ექნებოდა სხვა ოცნებები. მერე უთხრეს, რომ ეს ოცნებები რიგში უნდა ჩადგნენ, რადგან ჯერ კაცების ოცნებების ჯერია"

მწერალი გიორგი კეკელიძე სიუჟეტს გამოეხმაურა, სადაც ხაშურში მომხდარი საზარელი მკვლელობის ფაქტს ადგილობრივი ქალბატონი აფასებს. ქალი სიუჟეტში ამბობს, რომ "ქალი რომ ქმრის წინ ტლიკინებს, იმას რაღაცა მოხვდება."

კერძოდ, გიორგი კეკელიძე წერს:

"იმ ქალს, მოკლულ გოგონას რომ ჭკუას ასწავლის, ოდესღაც აუცილებლად ექნებოდა სხვა ოცნებები. მერე უთხრეს, რომ ეს ოცნებები რიგში უნდა ჩადგნენ, რადგან ჯერ კაცების ოცნებების ჯერია. რიგში ჩამდგარი ოცნებები კვდებიან. ჰოდა, ეს ქალი, საკუთარი ფიქრის სასაფლაოზე დამარხული ოცნებებით დადის. მძიმეა ეს სასაფლაო და ცდილობს სხვაც მას ჰგავდეს. ადამიანი ასე უფრო მშვიდად გრძნობს თავს. ამიტომაც ისიც მსხვერპლია, შეიძლება უკვე მოურჩენელი, მაგრამ მაინც მსხვერპლი და თანავუგრძნობ.

თქვენ კი, ძვირფასო ქალებო, ნურავინ მოგატყუებთ და ნურც თავს მოიტყუებთ, რომ ,,კაცის მერე უნდა ამოიღოთ ხმა". მშიშარა და უმაქნისი კაცების მოგონილია ეგ სიტყვები და საუკუნეებია გწამლავენ. ვიცი, ძნელია, ასე უცებ გამოდევნოთ სისხლიდან საწამლავი, მაგრამ აუცილებელი და გადაუდებელი საქმე მგონია.

დიახ, თქვენ ხართ ძალიან ძლიერები,

ძალიან ჭკვიანები

და ხმა ახლა უნდა ამოიღოთ. არა მერე და არა რიგში!" - წერს კეკელიძე.

შეგახსენებთ, ხაშურში ქმარმა 30 წლის ნათია გოგალაძე განსაკუთრებული სისასტიკით მოკლა. მკვლელობა იმ დღეს მოხდა, როცა წყვილს განქორწინება უნდა გაეფორმებინა.


თეგები :