• თბილისი
  • 13°C
  • 14 ნოემბერი, 2019
article

„თუ ჩვენ ვერ მივიღებთ პრეზიდენტისგან პასუხებს, რა არგუმენტაცია ედო საფუძვლად შეწყალებას, გამოძიება უნდა დაინტერესდეს ამ საკითხით“

„პრეზიდენტმა ან ადმინისტრაციამ აუცილებლად უნდა წარმოადგინოს დამატებით არგუმენტები, რა პროცესი გაიარა, ვინ იყო ინიციატორი და რა არგუმენტაცია ედო საფუძვლად შეწყალებას“, – ამის შესახებ  სახალხო დამცველმა, ნინო ლომჯარიამ საქართველოს პრეზიდენტის მიერ მსჯავრდებული პირების შეწყალების საკითხზე საუბრისას განაცხადა.

სახალხო დამცველის თქმით, შეწყალება არის პრეზიდენტის პრეროგატივა, მაგრამ ადამიანის უფლებათა სამართალი და სტრასბურგის სასამართლოს პრაქტიკა ამბობს, რომ სიცოცხლის უფლების მოსპობის შემთხვევაში, სახელმწიფოს მხრიდან გატარებული სასჯელი არ უნდა იყოს არაგონივრულად ლმობიერი.

„მე ვფიქრობ, რომ ის განმარტება, რომელიც გუშინ საქართველოს პრეზიდენტმა გააკეთა შეწყალების საქმესთან დაკავშირებით, არ არის საკმარისი. ვფიქრობ, რომ მან ან ადმინისტრაციამ აუცილებლად უნდა წარმოადგინოს დამატებით არგუმენტები, რა პროცესი გაიარა ამ შეწყალებამ, ვინ იყო ინიციატორი და რა არგუმენტაცია ედო საფუძვლად ამ შეწყალებას. მართალია, შეწყალება არის პრეზიდენტის პრეროგატივა, მაგრამ ასევე ადამიანის უფლებათა სამართალი და სტრასბურგის სასამართლოს პრაქტიკა ამბობს, რომ სიცოცხლის უფლების მოსპობის შემთხვევაში, სახელმწიფოს მხრიდან გატარებული სისხლის სამართლის პოლიტიკა უნდა იყოს ადეკვატური და სასჯელი არ უნდა იყოს არაგონივრულად ლმობიერი“, – განაცხადა ლომჯარიამ.

​სახალხო დამცველის თქმით, როდესაც სიცოცხლის მოსპობაში ბრალდებული პირის შეწყალება ხდება მაშინ, როდესაც მას არ აქვს მოხდილი საკმარისი რაოდენობა წლების, ეს ფაქტობრივად უთანაბრდება არაგონივრულად ლმობიერ სასჯელს.

„როდესაც სიცოცხლის მოსპობაში ბრალდებული პირის შეწყალება ხდება მაშინ, როდესაც მას არ აქვს მოხდილი საკმარისი რაოდენობა წლების, ეს ფაქტობრივად უთანაბრდება არაგონივრულად ლმობიერ სასჯელს და იმას, რომ სახელმწიფომ ვერ დაიცვა მოქალაქის სიცოცხლის უფლება და დამნაშავემ არ აგო პასუხი ისე, როგორც ეს უნდა ყოფილიყო სამართლიანი პროცესის შემთხვევაში. ამიტომ, თუ არ გვექნება ჩვენ მეტი ინფორმაცია და პრეზიდენტი არ წარმოადგენს უფრო მეტ ინფორმაციას, რა არგუმენტაციას ეყრდნობოდა და რა პროცესი გაიარა მან ამ გადაწყვეტილების მისაღებად, მე ვფიქრობ, რომ რა თქმა უნდა, ეს უნდა გახდეს გამოძიების დაწყების საფუძველი და ამაში არაფერი განსაკუთრებული არ არის“, – განაცხადა ნინო ლომჯარიამ.

​ამასთან სახალხო დამცველის თქმით, როდესაც ის იყო შეწყალების კომისიის წევრი, არაერთგზის დაწყებულა გამოძიება ცალკეული პირების საჯარო განცხადებების შემდეგ, რასთან დაკავშირებიაც მას ახსნა-განმარტებები მიცემული აქვს.

„მე მახსოვს, როდესაც ვიყავი შეწყალების კომისიის წევრი, არაერთგზის დაწყებულა გამოძიება ცალკეული პირების საჯარო განცხადებების შემდეგ და მე, როგორც კომისიის წევრი, მივსულვარ და მიმიცია ახსნა-განმარტება გარკვეული ბრალდებების თაობაზე. ამიტომ მე ვფიქრობ, რომ თუ ჩვენ ვერ მივიღებთ პასუხებს, რა თქმა უნდა გამოძიება უნდა დაინტერესდეს ამ საკითხით“, – განაცხადა ნინო ლომჯარიამ.


თეგები :