ლენი კრავიცი რასიზმისა და ბარაკ ობამას შესახებ

მომღერალი ლენი კრავიცი ჟურნალ The Block-ის გარეკანზე მოხვდა. როკ-მუსიკოსი ინტერვიუს უხალისოდ იძლეოდა, თუმცა, გამოცემამ შეძლო და მუსიკოსი აალაპარაკა ყოველდღიურ ცხოვრებაზე, ახალ ალბომზე, რასიზმსა და ბარაკ ობამაზეც კი.

2011 წელს ლენი კრავიცის მეცხრე სტუდიური ალბომი გამოვიდა, სახელწოდებით Black and White America. ასეთი სათაური თანამედროვე რასიზმის დამსახურებაა. მომღერალი ამ თემას განსაკუთრებულად განიცდის იმიტომ, რომ დაიბადა მუქკანიანი დედისა და ებრაელი თეთრკანიანი მამის ოჯახში. ასევე, არტისტმა შეისწავლა ამერიკის შეერთებული შტატების ამჟამინდელი პრეზიდენტის, ბარაკ ობამას, ისტორია. ლენი გაოცებულია იმ ადამიანებით, რომელთაც პრეზიდენტი მისი კანის ფერის გამო სძულთ.

„რა თქმა უნდა, ჩვენ ყველამ ვიცით, რომ რასიზმი არსებობს. მაგრამ როდესაც მესმის ამ „სენით“ შეპყრობილი ადამიანების შესახებ, ვერ ვიჯერებ, რომ ეს სინამდვილეში ხდება“ - ამბობს ვარსკვლავი.

ახლა მომღერალი ჩრდილოეთ კაროლინაში გადაღებებზე იმყოფება. ლენი სტილისტის როლს თამაშობს სიუზან კოლინზის რომანის „დამშეული თამაშები“-ს ეკრანიზაციაში.

„ეს დიდი ფილმი იქნება!“-აცხადებს ლენი კრავიცი.

როდესაც მომღერალი თავისუფალია, არაა გადაღებებზე ან კონცერტებზე, ზაფხულს და გაზაფხულს პარიზში ატარებს. შემოდგომასა და ზამთარს კი ბაჰამის კუნძულებზე, აქ მისი დედა დაიბადა.

კითხვაზე, რას აკეთებთ მთელი დღის განმავლობაში, მომღერალმა უპასუხა:

„პირველს რასაც გაღვიძებისას ვაკეთებ, გამოვდივარ ოთახიდან, შევხედავ მზეს და ღმერთს მადლობას ვეუბნები ამ დღისათვის, ასევე ვყვინთავ წყალში, ვზივარ, ვფიქრობ, ვწერ მუსიკას, ვფიქრობ იმაზე თუ სად ვისადილო. მივდივარ სტუდიაში, ვწერ სიმღერებს.“

ამერიკელი მომღერალი, კომპოზიტორი, მულტიინსტრუმენტალისტი, პროდიუსერი ლეონარდ ალბერტ „ლენი“ კრავიცი დაიბადა 1964 წლის 26 მაისს, ნიუ-იორკში. მისი მუსიკა აერთიანებს ისეთ მიმდინარეობებს, როგორებიცაა როკი, სოული,  funk, რეგი, მძიმე როკი, psychedelia, ფოლკი და ბალადები.

მომღერალმა ოთხი წლის განმავლობაში ზედიზედ მიიღო ოთხი გრემი, 1998-2002 წლებში, როგორც Best Male Rock Vocal Performance-მა. დღევანდელი მონაცემებით, ლენი კრავიცის 20 მილიონზე მეტი ალბომია გაყიდული მსოფლიოს მასშტაბით.

0

ავტორი: