ვაჟა-ფშაველას დაბადებიდან 150 წლის აღსანიშნავად იქმნება კალიგრაფიული ხელნაწერები

ვაჟა-ფშაველას დაბადებიდან 150 წლის აღსანიშნავად იქმნება კალიგრაფიული ხელნაწერები

2011 წელს მსოფლიო მასშტაბით, UNESCO-ს ეგიდით ვაჟა-ფშაველას 150 წლის იუბილე აღინიშნება. ამასთან დაკავშირებით, საქართველოს მხატვარ-კალიგრაფთა კავშირის წევრების მიერ იქმნება ხელნაწერი წიგნები - ვაჟა-ფშაველას პოემები.

UNESCO-ს  გენერალური კონფერენციის 35-ე სესიამ დაამტკიცა იმ საიუბილეო თარიღების ჩამონათვალი, რომლებიც 2011  წელს აღინიშნება UNESCO-ს წევრი სახელმწიფოების მიერ.  მსოფლიო მნიშვნელობის 63 იუბილის ჩამონათვალში შეტანილია ვაჟა-ფშაველას დაბადების 150 წელი.

საქართველოს მხატვარ-კალიგრაფთა კავშირი ამ მნიშვნელოვან თარიღს აღნიშნავს პროექტით, რომელიც ვაჟა-ფშაველას შემოქმედების ფონზე, თანამედროვე კალიგრაფიული ხელნაწერების დემონსტრირებას ისახავს მიზნად.

კავშირის წევრების მიერ მზადდება ხელნაწერი წიგნები ვაჟა-ფშაველას პოემების მიხედვით:

ალუდა ქეთელაური  
გველის მჭამელი
მანდილი
ბახტრიონი
მონადირე

გოგოთურ და აფშინა
ანნა-ბულბული
მამიდის დანაბარები
ახუნდი
სისხლის ძიება

ეთერი
კოპალა
დაჭრილი ვეფხვი
ძაღლიკა ხიმიკაური

ნამუშევრების ფორმატად და სტილად აღებულია 2009 წელს შექმნილი ხელნაწერი წიგნი „სტუმარ-მასპინძელი“. ტექსტი, ორნამენტებითა და მინიატურებით კეთდება ფურცლის ცალ მხარეს, რომ ორიგინალები ჩარჩო-პასპარტუში ჩაისვას გამოსაფენად. აიკინძება წიგნის 20-მდე ძვირფასი ხელნაკეთი ასლი, რომლებსაც დამთვალიერებელი გამოფენაზე გადაფურცლავს და სურვილის შემთხვევაში - შეიძენს.

პრეზენტაცია შემოდგომის ბოლოს იგეგმება. გამოფენები გაგრძელდება მომავალ წელსაც და საქართველოს რეგიონებს მოიცავს.
 
პროექტში მონაწილეობის მსურველთათვის საქართველოს მხატვარ-კალიგრაფთა კავშირი 2011 წლის პირველი აგვისტოდან აწყობს კონკურსს.

კონკურსში მონაწილეობა შეუძლია ნებისმიერი ასაკის პიროვნებას, რომელიც არ არის გაწევრიანებული კალიგრაფთა კავშირში.

მონაწილემ უნდა შექმნას სიგელის სტილის ხელნაწერი ვაჟა-ფშაველას ერთ-ერთი ლექსის მიხედვით (რაოდენობა შეზღუდული არ არის).

1.ნამუშევართა ფოტოები თავსდება facebook-ზე და ხდება შეფასება ინტერნეტ-მომხმარებლის მიერ. პრიზები დაწესებულია სამი ინტერნეტ რჩეულისათვის.

2.ამასთანავე, საქართველოს მხატვარ-კალიგრაფთა კავშირი საკუთარი შეფასებით გამოავლენს 10-მდე საუკეთესო ავტორს, რომელთა კალიგრაფიული ორიგინალები წარმოდგენილი იქნება პროექტის პრეზენტაციაზე და გამოფენებზე, კალიგრაფთა კავშირის წევრების მიერ შექმნილ ხელნაწერ პოემებთან ერთად.

იხ. ჩვენი გვერდი facebook-ზე.

გამარჯვებულთა გამოვლენა და დაჯილდოვება მოხდება სექტემბრის პირველ კვირაში. ნამუშევართა ფოტოების მიღების ბოლო ვადაა 2011 წლის 28 აგვისტო.

გამოაგზავნეთ 3 მეგაბაიტამდე ფაილები ელ-ფოსტის მისამართზე: [email protected] (ავტორის სახელისა და გვარის, ასაკის, მისამართისა და საონტაქტო ტელეფონის მითითებით).

ინსტრუქცია: ნამუშევრების სიგანე არ უნდა აღემატებოდეს 21 სანტიმეტრს, სიმაღლე 120 სანტიმეტრამდეა დასაშვები; უნდა შესრულდეს ფურცლის ცალ მხარეს და კიდეებზე გააჩნდეს თავისუფალი 10 მილიმეტრიანი ველი ჩარჩოში ჩასასმელად. ხელნაწერი წიგნისგან განსხვავებით, სიგელის კალიგრაფიული სტილი უფრო თავისუფალია. არ იზღუდება ორნამენტული დეკორის სიჭარბე და დიდი ზომის, თუნდაც რთულად წასაკითხი, მხატვრული ასო-ნიშნების გამოყენება.

0

ავტორი: