10:52:53 04-07-2011
„კამელოტი“ დაიხურა
ტელეარხმა „Starz“-მა სერიალი „კამელოტი“ პირველივე სეზონის შემდეგ დახურა. საიტ „დედლაინის“ ინფორმაციით, სერიალის დახურვის მიზეზები არ ხმაურდება. უკანასკნელ რამდენიმე სერიას, აუდიტორიის სტაბილური ზრდა ჰქონდა და 1,5 მილიონი მაყურებლის მოზიდვა შეძლო.
„დედლაინის“ წყაროს ინფორმაციით, დახურვის მიზეზი, სავარაუდოდ, მონაწილე მსახიობების გრაფიკის შეუთანხმებლობა გახდა. სერიალში მოქმედება მეფე უტერის ქორწინებისგარეშე დაბადებული ვაჟის, არტურის ირგვლივ ვითარდება, რომელიც მამის სიკვდილის შემდეგ, გვირგვინზე პრეტენზიას აცხადებს. მის კანდიდატურას მხარს უჭერს ჯადოქარი მერლინი და მისი ერთგული ზოგიერთი რაინდი. არტურს მოწინააღმდეგედ ნახევარდა, მორგანა გამოუჩნდება, რომელიც ძმის განადგურებას ძალისა და მაგიის საშუალებით ცდილობს.
სერიალში, მთავარ როლებში მონაწილეობენ: ჯეიმი კემპბელ ბაუერი, თემსინ ეგერთონი, ჯოზეფ ფაინსი, ევა გრინი და კლერ ფორლანი. პროდიუსერი კი - გრემ კინგია.
0