10:04:16 11-01-2019
მუხიანში ელექტროშოკის გამოყენებით ქალზე ძალადობაში ბრალდებული დააკავეს
30 დეკემბერს მუხიანის დასახლებაში მომხდარ ძალადობის ფაქტზე შსს–მ 1995 წელს დაბადებული პირი დააკავა.
როგორც შინაგან საქმეთა სამინისტროში აცხადებენ, ქალაქ თბილისის პოლიციის დეპარტამენტის გლდანი-ნაძალადევის სამმართველოს თანამშრომლებმა, ძალადობის ფაქტზე, 1995 წელს დაბადებული რ.ა 31 დეკემბერს დააკავეს. დანაშაული 6-დან 8 წლამდე თავისუფლების აღკვეთას ითვალისწინებს.
„პოლიციის მიერ გატარებული ოპერატიულ-საგამოძიებო და სამძებრო ღონისძიებების შედეგად ბრალდებული მუხიანში დააკავეს. გამოძიებით დადგინდა, რომ რ.ა-მ 30 დეკემბერს მუხიანის დასახლებაში ელექტროშოკის გამოყენებით 1984 წელს დაბადებულ ქალს სხეულის დაზიანება მიაყენა, იძალადა და შემთხვევის ადგილიდან მიიმალა. პოლიციამ ცხელ კვალზე ჩატარებული ოპერატიული ღონისძიებებით ბრალდებული დანაშაულის ჩადენიდან რამდენიმე საათში დააკავა. სამართალდამცველებმა ბრალდებულის საცხოვრებელი სახლის ჩხრეკისას ელექტრო შოკი და სხვა ნივთმტკიცებები ამოიღეს. ამჟამად ბრალდებულს სასამართლოს გადაწყვეტილებით აღკვეთი ღონისძიების სახით წინასწარი პატიმრობა აქვს შეფარდებული. გამოძიება სისხლის სამართლის კოდექსის 137-ე მუხლის I ნაწილით მიმდინარეობს“, - ნათქვამია უწყების განცხადებაში.
მანამდე სოციალურ ქსელში ქალბატონმა წერილი გამოაქვეყნა, სადაც წერდა:
"მინდა გაფრთხილდეთ, უმეტესად მდედრებს მივმართავ, რაც მე გადამხდა თავს მტერს არ ვუსურვებ.30 დეკემბერს ღამის 9-დან 10-ის ნახევრის ინტერვალში გლდანში გობრონიძის ქუჩიდან მიმავალი საცალფეხო ბილიკზე რომელიც მუხიანის დასახლებას აკავშირებს ელექტროშოკის 4 დარტყმით პარალიზება მოახდინა ჩემზე და იძალადა, გადავრჩი, რადგან ელექტროშოკერი როგორც მოგეხსენებათ ხშირ შემთხვევაში გულს აჩერებს.საკუთარი თავი თქვენვე დაიცავით მინიმუმ ცრემლსადენი გაზი იქონიეთ ჯიბეში. გაფრთხილდით," - დაწერა ქალბატონმა.
0