11:30:36 22-02-2018
მეთევზეებმა ჩაქვის აკვატორიაში ე.წ „ზღვის ეშმაკი“ იპოვეს
ჩაქვის აკვატორიაში ქართველმა მეთევზეებმა თევზის უნიკალური ეგზემპლარი მოიპოვეს.
გარემოს დაცვისა და სოფლის მეურნეობის სამინისტროს მეთევზეობისა და შავი ზღვის მონიტორინგის დეპარტამენტის სპეციალისტებმა დაადგინეს, რომ აღნიშნული თევზის სახეობა მიეკუთვნება „ზღვის ეშმაკს“, რომელიც მსოფლიო ოკეანის სიღრმისეული ფენების ბინადარია.
ზღვის ეშმაკი ბათუმის მახლობლად პირველად 1955 წელს მოიპოვეს. ეგზემპლარის ფიტული დღეს აჭარის მხარეთმცოდნეობის მუზეუმში ინახება.
თევზის ეს უნიკალური ეგზემპლარი, მეთევზეობისა და შავი ზღვის მონიტორინგის დეპარტამენტის სპეციალისტებმა 2008 წელს ფოთის აკვატორიაში მოიპოვეს და საქართველოს ეროვნულ მუზეუმს გადასცეს.
სპეციალისტების განმარტებით, შავ ზღვაში თევზის ეს სახეობა იშვიათია, საქართველოში კი ხმელთაშუა ზღვის აუზიდან აღწევს. გამომდინარე იქიდან , რომ შავი ზღვის სიღრმისეული ფენები 130-ი მეტრი სიღრმის ქვევით გოგირდწყალბადით არის გაჯერებული მისი საქართველოში მოპოვება მაღალი სამეცნიერო ფაქტია.
მეთევზეობისა და შავი ზღვის მონიტორინგის დეპარტამენტის სპეციალისტები შავი ზღვის მონიტორინგს და სამეცნიერო კვლევებს განაგრძობენ.
0