15:00:00 05-02-2018
ისკო დასენი: ჩამდები უფრო მკაცრად უნდა დაისაჯოს, ვიდრე გამსაღებელი
პარლამენტი ახალ ნარკოპოლიტიკაზე მუშაობას. შესაბამისი კანონპროექტი "ნარკოპოლიტიკის ეროვნულმა პლატფორმამ“ წარადგინა და ვიდრე პროცესი საკანონმდებლო ორგანოში გადაინაცვლებს, მმართველი გუნდი სხვადასხვა მოსაზრებებს ისმენს. ხელისუფლება თანხმდება, რომ არსებული კანონი ზედმეტად მკაცრია, თუმცა არის პრინციპული საკითხები, რაზეც გუნდში თანხმობა არ არსებობს. როგორც კანონპორექტზე მომუშავე კანონმდებლების ნაწილი აცხადებს, ნარკოპოლიტიკა ერთ-ერთი ურთულესი მიმართულებაა, ეს არის მსოფლიო პრობლემა და ჩვენც არ ჩამოვრჩებით ამ პრობლემებში მსოფლიოს.
ნარკოპოლიტიკა დღეს და გუშინ არ დაწყებულა, ნარკოპოლიტიკა 2000 წლების დასაწყისიდან განსაკუთრებით რეპრესიული იყო და ამ რეპრესიულ ნარკოპოლიტიკასაც თავისი შედეგი ჰქონდა, თუმცა „ქართული ოცნების“ ხელისუფლებაში მოსვლის შემდეგ გარკვეული ლიბერალური დამოკიდებულება, ეფექტიანი და თანმიმდევრული ნარკოპოლიტიკის განხორციელება დაიწყო.
Presa.ge საპარლამენტო უმრავლესობის წევრს ისკო დასენის ესაუბრა:
- ნარკოპოლიტიკის ლიბერალიზაციის მიმართულებით შემუშავებულ ინიციატივაზე აქტიური მსჯელობა მიმდინარეობს, როგორც პოლიტიკურ წრეებში, ისე საზოგადოებაში. საკითხი თავისი პრობლემატურობიდან გამომდინარე დაპირისპირების საგანს წარმოადგენს და ცნობილია, რომ არსებულ კანონპორექტს მოწინააღმდეგეები მმართველ გუნდშიც საკმარისად ჰყავს. თქვენ რა პოზიცია და არგუმენტები გაქვთ?
- ნარკოპოლიტიკაზე საათობით ლაპარაკი შეიძლება, თუმცა, ერთი რამ ცხადია, რომ საბოლოოდ პარლამენტში მიღებული იქნება გადაწყვეტილება, რომელიც სასარგებლო იქნება ქვეყნისთვის. განსხვავებული პოზიციები არსებობს და არის ასეთი პოზიცია, რომ მოხდეს ნარკოტიკის დეკრიმინალიზაცია. პარლამენტარების გარკვეული ჯგუფს აქვს თავისი პოზიცია და მე პირადად ვამბობ, რომ საზოგადოება ამისთვის მზად არ არის. საჭიროა, ყველა სასწავლო დაწესებულებაში ჩატარდეს ლექციების კურსი. ბევრ ასაკოვან მოქალაქესაც უნდა გავაგებინოთ, რომ ნარკოტიკი არის ცუდი. გუშინ ტელევიზიით სიუჟეტი გავიდა, სადაც ითქვა, რომ თურმე, მარიხუანა ჯანმრთელობისთვის სასარგებლო და კიბოსაც არჩენს.
- თქვენი აზრით, არის თუ არა, ეს პროპაგანდა, რომელიც სწორედ ნარკოტიკის დეკრიმინალიზაციას გულისხმობს, ან რამდენად შესაძლებელია, რომ კანონმდებლობის შეცვლით სწორედ ასეთი პროპაგანდის ვექტორი შეიცვალოს?
- ჩვენ ვცხოვრობთ დემოკრატიულ ქვეყანაში. ყველა ლაპარაკობს და ტელევიზიით აჩვენებს იმას, რაც თავად უნდა. ამის გაკეთება არ შეიძლება, რადგან ყველა ნარკოტიკი არის მავნე. ყველა ნარკომანი მარიხუანიდან იწყებს ნარკოტიკის მოხმარებას. ჩვენი პოზიცია ერთია, რომ ყველა ნარკოტიკი არის ცუდი, უბრალოდ უნდა ჩატარდეს პრევენცია, ავადმყოფთა განკურნება. მე ვამბობ, რომ თუ არ უნდა ნარკომანს მკურნალობა და ამ ბინძურ საქმეში მხოლოდ სხვისი ჩათრევა სურს, ასეთი ნარკომანი აუცილებლად იზოლირებული უნდა იყოს. იძულებითმა მკურნალობამ თუ არ უშველა, მაშინ უნდა მოიხადოს სასჯელი აღმკვეთი ღონისძიების სახითაც.
- როდესაც საუბრობენ იმაზე, რომ ნარკოტიკული საშუალება უნდა იყოს თავისუფალ გაყიდვაში, რას ცვლის ასეთი მიდგომა ნარკომანთა წრის წარმომადგენელთა სასარგებლოდ ის, რომ არ დაზარალდეს არამომხმარებელი საზოგადოება?
- რასაც თქვენ ამბობთ, ეს ლეგალიზაციას ნიშნავს, პარლამენტში კი იხილება მხოლოდ ერთი საკითხი - დეკრიმინალიზაცია, ანუ სისხლის სამართლის პასუხისმგებლობა არ დადგება და ისინი დაისჯებიან ადმინისტრაციული წესით. აქ უბრალოდ, ვართ დეპუტატების ნაწილი, რომლებიც დეკრიმინალიზაციის მოწინააღმდეგეებიც ვართ. ჩვენ ვამბობთ, რომ იმის გათვალისწინებით, თუ სად ვიმყოფებით გეოპოლიტიკურად, ვინ არის ჩვენს გარშემო, ამან შეიძლება ცუდი შედეგი მოიტანოს. რასაც ამბობენ დეკრიმინალიზაციის მომხრეები, თეორიულად ეს შესაძლებელია, მაგრამ სარისკოა.
- თუ კი საამისო მზაობა არ არსებობს, მაშინ რატომ დადგა დღის წესრიგში არსებული კანონმდებლობის რეფორმა, როგორც სისხლის სამართლის, ისე ჯანდაცვის მიმართულებით?
- ამას ითხოვენ ნარკომომხმარებლები. ევროპის ბევრ ქვეყანაში ნარკოტიკი ლეგალიზებულია, მაგრამ ჩემი აზრით, ამ ქვეყნებისთვის კარგი არაფერი მოუტანია. ჩვენთან შეიძლება უარესი შედეგიც დადგეს. ხომ ხედავთ, რამხელა დემოკრატიის ხარისხი გვაქვს ქვეყანაში, რომ პარლამენტის ერთი გუნდის წევრებს სხვადასხვა პოზიცია გვაქვს, ვმსჯელობთ და მაქსიმალურად ცდილობთ პოზიციების დაახლოებას. ჩვენ ნარკომანებიც გვეცოდება, რადგან ტრაგედია და საშინელებაა, როცა ადამიანი ერთხელ შეცდა, მოიხმარა ნარკოტიკი, შემდეგ გახდა ნარკომანი და ის ციხეში ჩასვეს.
- როგოც ცნობილია, დოზებთან დაკავშირებით უკვე მოხდა პოზიციების შეჯერება. ათავისუფლებს თუ არა ახალი კანონპროექტი სისხლის სამართლებრივი პასუხისმგებლობისგან პირს, რომელიც არის მომხმარებელი და მას ჯიბეში, ან სახლში 45 აბი სუბოტექსი უდევს, მაშინ როცა 1 აბი იწვევს 8 ადამიანის ნარკოტიკულ თრობას? რამდენად დამაჯერებელია , რომ ის შეიძლება იყოს მხოლოდ მომხმარებელი?
- გეთანხმებით, რომ არსებობს ასეთი პოზიცია, მაგრამ დამიჯერეთ, საბოლოოდ მივალთ ერთ დასკვნამდე და მივიღებთ სწორ გადაწყვეტილებას. არ შეიძლება, რომ ადამიანი, რომელიც მოიხმარს ნარკოტიკს, სთავაზობს მას თავის მეგობარს, მეგობრის მეგობარს და არის ფაქტიურად გამსაღებელი, არ შეძილება ჩავთვალოთ, რომ ის მხოლოდ მომხმარებელია და თავი უნდა დავანებოთ. ასე არის ჩემი პოზიცია.
- რამდენად ადეკვატურია მხოლოდ ავადმყოფი ეწოდოს ნარკომანს, რომელსაც წამლის პერმანენტულად მისაღებად, მუდმივად ესაჭიროება თანხა, რომლის მოპოვებაც პირდაპირ კავშირში შეიძლება იყოს სისიხლის სამართლის სხვა დანაშაულთან, მაგალითად, ძარცვა-ქურდობასთან და ა.შ.
- არიან ადამიანები, რომლებიც ზოგჯერ მოიხმარენ მხოლოდ მარიხუანას, მაგრამ სამწუხაროდ, ასეთები არ ჩანან როგორც ნარკომანები. ნარკომანია ის, ვინც მოიხმარს სუბოტექსს, ჰეროინს კოკაინს და ა.შ. რასაც თქვენ ამბობთ, აქ გაყოფა ძალიან ძნელია და როდესაც ადამიანი სჩადის დანაშაულს, მითუმეტეს უნდა აგოს პასუხი, მაგრამ ჩვენ ზუსტად ვიცით, რომ ნარკოტიკის მომხმარებელი აუცილებლად სჩადის დანაშაულს?
როდესაც ნარკომანს ფული აქვს, ის დანაშაულს არ სჩადის, მაგრამ ვისაც არა აქვს, მან უნდა მოიპაროს, წაართვას, რათა იშოვნოს...
- ასეთმა ადამიანმა, რა თქმა უნდა პასუხი უნდა აგოს. მერწმუნეთ, რომ კანონპროექტში შესწორებები აუცილებლად შევა და უნდა მივიღოთ მაქსიმალურად დახვეწილი კანონი, რადგან შემდგომში უკან დახევა ძნელი იქნება. ჩვენ ცალსახად იმის თქმაც არ შეგვიძლია, რომ კანონი უნდა დარჩეს ისეთი, როგორიც დღეს არის. ბევრი ადამიანი ვიცით, რომელსაც ნარკოტიკი ჩაუდეს და ამის გამო ციხეში ისხდნენ. სხვათაშორის, არიან ნარკოტიკის მომხმარებლები, რომლებიც ამბობენ, რომ სისხლის სამართლის კოდექსში შესაბამისი მუხლი უნდა გაუქმდეს, იმის გამო, რომ არ იყოს ჩადება. ეს უკვე სასაცილოა და აბსურდამდე მივდივართ. მიმაჩნია, რომ ჩამდები უფრო მკაცრად უნდა დაისაჯოს, ვიდრე გამსაღებელი. ამაზე სახელმწიფომ და ხელისუფლებამ უნდა იზრუნოს.
0