16:26:11 11-12-2017
გიგი წერეთელი: მიხეილ სააკაშვილი თავად აცხადებს, რომ ამ ეტაპზე არის უკრაინელი პოლიტიკოსი
უკრაინელი ოპოზიციონერი დეპუტატები მიხეილ სააკაშვილს თავდებში ჩაუდგნენ. მათ ხელი მოაწერეს დოკუმენტს, რომლიც მიხედვითაც ისინი თავდებში უდგებიან ოდესის ყოფილ გუბერნატორს.
ადვოკატების კიდევ ერთი შუამდგომლობა უფრო დიდი სასამართლო დარბაზის გამოყოფასთან დაკავშირებით, მოსამართლემ არ დააკმაყოფილა.
ადვოკატების თქმით, პროცესუალური ნორმები დარღვეულია და მიხეილ სააკაშვილი უნდა გათავისუფლდეს ყოველგვარი აღკვეთის ღონისძიების გარეშე დაა მას უნდა მიეცეს თავისუფლად გადაადგილების საშუალება.
Presa.ge საპარლამენტო ფრაქცია „ევროპული საქართველოს“ თავმჯდომარე გიგი წერეთელს ესაუბრა:
- საპარლამენტო უმრავლესობის წევრები მიიჩნევენ, რომ საქართველოს მესამე პრეზიდენტის შესაძლო ექსტრადირების საკითხი წმინდა სამართლებრივი პროცესია და მის მიმართ პოლიტიკური ინტერესები არ არსებობს. თქვენ როგორ აფასებთ კიევში მიმდინარე მოვლენებს, არის თუ არა მიხეილ სააკშვილის დაკავების საკითხი პოლიტიკური დევნა?
- რაც ხდება უკრაინაში, ნამდვილად არ არის მარტივი პროცესი. ჩვენ უკრაინას ვეხმარებით და სოლიდარული ვართ იმ ბრძოლაში, რომელიც მას აქვს თავისუფლებისთვის, დემოკრატიისთვის, ევროპული ინტეგრაციისთვის, რეფორმებისთვის მთელი მსოფლიოა მობილიზებული და ასეთ ვითარებაში ნამდვილად გვინდა, რომ ამ თანადგომის საშუალებები არსებობდეს. პროცესი რაც დღეს არის, ყველაფერს ძალიან ასუსტებს. ვიღაცას მოწონს თუ არ მოწონს მიხეილ სააკაშვილის აქტიურობა, ის არის პოლიტიკოსი და თავად აცხადებს, რომ ამ ეტაპზე ის არის უკრაინელი პოლიტიკოსი. აქედან გამომდინარე, როგორც პოლიტიკოსს, მიხეილ სააკაშვილს უნდა ჰქონდეს თავისი მოქმედებების საშუალება იმ ჩარჩოებში, რის უფლებებსაც კანონი ანიჭებს. აქედან გამომდინარე, პოლიტიკური ოპონენტის მიმართ უნდა იყოს შესაბამისი დამოკიდებულება, რისი ვალდებულებებიც უკრაინას აქვს.
- თუკი მიხეილ სააკაშვილმა კანონი დაარღვია, მის მიმართ სამართლებრივი ქმედებები რატომ არის პოლიტიკური დევნა?
- ეს მეორე საკითხია. თუ არის გამოსაძიებელი და გასარკვევი, ამისთვის ბუნებრივია, არსებობს პროცედურები, მაგრამ ეს უნდა იყოს გამჭვირვალე, პროფესიული და არ უნდა ტოვებდეს პოლიტიკური შურისძიებისა თუ სხვა მოტივის საფუძველს.
- გუშინ, ორგანიზაცია „თეთრი ხმაურის“ აქციაზე პარლამენტს მოსთხოვეს, დაჩქარებული წესით მოხდეს ნარკოპოლიტიკასთან დაკავშირებული კანონპროექტის განხილვა. აქციის მონაწილეებმა ფაშისტები უწოდებს იმ დეპუტატებს, ვინც კანონის მიღებაზე უარს იტყვის. საინტერესოა, თქვენი დამოკიდებულება იმ კანონპროექტისადმი, რომლის განხილვაც პარლამენტში მიზეზთა გამო, ვერ იწყება?
-ის, რომ ნარკოპოლიტიკის სფეროში ცვლილებები დროულად არის მისაღები, ეს არის სიმართლე. სხვების შეფასებებში ვერ ჩავერევი, თუმცა ვთხოვდი, რომ თუნდაც იმ დეპუტატების მიმართ, ვისაც განსხვავებული მოსაზრება აქვთ, ასეთი ფორმით კრიტიკისადმი იყვნენ ტოლერანტულები. მე 10 წელიწადია ვამბობ და ვიყავი პირველი, ვინც კანონპროექტი შეიტანა პარლამენტში ამ საკითხთან დაკავშირებით. მთელი ეს წლებია, მიწევს მტკიცება, რომ საჭიროა ცვლილებები, რომელიც უფრო ჰუმანური და ადეკვატური იქნება. ვფიქრობ, უფრო სისტემური ცვლილებაა საჭირო და არა რაღაც გადაწყვეტილებები, რომელიც ქაღალდზე დაფიქსირდება. გვჭირდება განსხვავებული მიდგომები, თუმცა არაა საუბარი იმაზე, რომ ნარკოტიკები თავისუფლად უნდა იყოს, არამედ საუბარია იმაზე, რომ ნარკოტიკის მომხმარებლების მიმართ უნდა იყოს არა რეპრესიული მეთოდები, არამედ სხვა დამოკიდებულება.
0