17:10:21 08-02-2016
კახეთში 17 წლის ბიჭი საკუთარი დის გაუპატიურების ბრალდებით დააკავეს
კახეთში 17 წლის ბიჭს სასამართლომ აღკვეთის ღონისძიების სახით პატიმრობა შეუფარდა. არასრულწლოვანს ბრალი საკუთარი დის გაუპატიურებაში ედება. "კახეთის საინფორმაციო ცენტრი" ინფორმაციას ავრცელებს, რომ გოგონა, რომელიც 15 წლის არის, 8 თვის ორსულია. სოციალური მომსახურების სააგენტომ, გოგონა უსაფრთხოების მიზნით სპეციალიზებულ დაწესებულებაში გადაიყვანა.
როგორც სოციალური მომსახურების სააგენტოს უფროსმა "კახეთის საინფორმაციო ცენტრს" განუცხადა, გოგონასთან დაკავშირებით სააგენტოს პოლიციამ მიმართა.
შს სამინისტროს ინფორმაციით, გამოძიება სსკ-ის 111 - 137-ე მუხლის მე-3 ნაწილით მიმდინარეობს, რაც გულისხმობს ოჯახურ დანაშაულს, გაუპატიურებას არაერთგზის.
აღნიშნულ საქმესთან დაკავშირებით კომენტარს არ აკეთებენ პროკურატურასა და სასამართლოში, თუმცა ინფორმაციას ადასტურებენ.
სკოლის დირექტორის ინფორმაციით, გოგონამ სწავლა მე-9 კლასის დამთავრების შემდეგ შეწყვიტა, ბიჭი კი მე-11 კლასის მოსწავლეა. მისივე თქმით, ბიჭი გაკვეთილებს ჩვეულებრივ ესწრებოდა და მისთვის უცნაური არავის არაფერი შეუმჩნევია. დამატებით დეტალებზე დირექტორი არ საუბრობს.
0