მომღერალი ტინა კაროლი ბათუმს უკრაინის დამოუკიდებლობის დღეს სტუმრობდა

“ჰით ბათუმი 2015” ფარგლებში ზღვისპირა ქალაქს უკრაინელი მომღერალი ტინა კაროლი ესტუმრა. მომღერალი  მცირეწლოვან შვილთან ერთად საქართველოში პირველად ჩამოვიდა. "ჰით ბათუმი 2015"-ის ორგანიზატორებმა ტინა კაროლი უკრაინის დამოუკიდებლობის დღეს მოიწვიეს. კონცერტი ბათუმის ჩოგბურთის კორტებზე გაიმართა.

ტინა კაროლი გამოსვლა ძალიან ემოციური აღმოჩნდა. ამ მნიშვნელოვან დღეს მან საკუთარი ქვეყანა - უკრაინა საქართველოში წარადგინა. „მე გავუზიარე უკრაინის სითბო საქართველოს. 2 საათი სცენაზე ვიყავი. შევასრულე ჩემი სიმღერები და ასევე პოპულარული მშობლიური სიმღერები. ასევე შევასრულე ქართული სიმღერა და ეს იყო საჩუქარი თქვენთვის,“ - აღნიშნა მომღერალმა.

 „ძალიან გახარებული ვარ, ეს არის ჩემი პირველი ვიზიტი საქართველოში. პირველად ვიყავი ქართულ სცენაზე და ცოტათი ვნერვიულობდი - ვფიქრობდი როგორი საღამო გამოვიდოდა. კონცერტი იყო შესანიშნავი, აუდიტორია - გასაოცარი, ჯადოსნური საღამო იყო და მთელი ცხოვრება მემახსოვრება ის თვალები, ღიმილი და აპლოდისმენტები, რაც აქ ვნახე. შვილთან ბენჯამენთან ერთად ჩამოვედი და ძალიან კარგი დრო გავატარეთ. ის ძალიან ბედნიერია და მეუბნება, რომ კიდევ უნდა აქ ჩამოსვლა. ჩვენ ვაპირებთ დაბრუნებას. ძალიან მოხარული ვარ, რომ საქართველო და უკრაინა მეგობრები არიან. ჩემს მშობლებს, ჩემს ნათესავებს ვეტყვი, რომ ჩამოვიდნენ და ნახონ საქართველო. მომდევნო ჯერზე როცა დრო მექნება საქართველოს მთებში მინდა წავიდე და ვიმოგზაურო საქართველოს გარშემო. მინდა ქართველი დიზაინერების მაღაზიებს ვესტუმრო. მათ ძალიან საინტერესო სტილი აქვთ. მე ვნახე ზღვა და ის არაჩვეულებრივია. ბათუმში ძალიან ლამაზი შენობები და გემრიელი საჭმელები გაქვთ, ვიცი ქართული მწვადის გემო. მიყვარს ქართული საჭმელები. კიევში არის ქართული რესტორანი, ის ჩემი საყვარელი ადგილია. ძალიან ბერი საჭმელებია ხოლმე ქართულ სუფრაზე. გუშინ გავსინჯე ქართული ღვინო - ძალიან კარგია. ქართველები კი  ძალიან თბილი, ემოციური და სანდო ადამიანები არიან,“ - ასეთია უკრაინელი პოპ-დივას შთაბეჭდილებებს საქართველოზე.

 

ტინა კაროლი 2005 წელს მუსიკალურ ფესტივალ "ახალ ტალღაზე" მიღწეული ტრიუმფით გახდა ცნობილი. მან ალა პუგაჩოვას პრიზი 50 ათასი დოლარი მოიპოვა. კაროლი 2005 წლის შემოდგომაზე სამშვიდობო მისიის ფარგლებში ერაყსა და კოსოვოს ესტუმრა.

პროექტი „ჰით ბათუმი“ 11 კვირისგან შედგება და თოთოეული კვირა სხვადასხვა მიმართულების არტს მოიცავს. მრავლფეროვანი პროგრამა გათვლილია ყველა თაობისა და გემოვნების ადამიანისთვის. შესაბამისად, დამსვენებლებს შესაძლებლობა აქვთ, საკუთარი ინტერესებიდან გამომდინარე, დაგეგმონ ბათუმში დასვენებისა და გართობის დღეები.

 „ჰით ბათუმის“ ფარგლებში, 2 თვის განმავლობაში დაგეგმილია 200-ზე მეტი ღონისძიება, ამ პერიოდის  განმავლობაში ბათუმს 20-მდექვეყნიდან 259 უცხოელი არტისტი  სტუმრობს. ღონისძებაში ჩართულია 50 ორგანიზაცია და 2000-მდე მონაწილე.

„ჰით ბათუმი 2015“ წარმოადგენს ბათუმის საზაფხულო სეზონის სპეციალურ პროექტს, რომელიც თავის თავში მოიცავს 2 თვიანი პერიოდის განმავლობაში სხვადასხვა მიმართულების ფესტივალებისა და გასართობი ღონისძიებების ჩატარებას უწყვეტ რეჟიმში. 6 ივლისიდან 15 სექტემბრამდე, ყოველ კვირას, ბათუმში ჩატარდება განსხვავებული ტიპის ივენთები, რომლის კომუნიკაციაც მოხდება ერთიანი ქოლგის ქვეშ, სახელწოდებით „ჰით ბათუმი“.

პროექტის განმახორციელებელია ბათუმის მერია და საკრებულო, ასევე მის განხორციელებაში ჩართულები არიან კულტურისა და ძეგლთა დაცვის სამინისტრო და მისი სსიპი „კულტურის განვითარების საინვესტიციო ფონდი“, ტურიზმის ეროვნული ადმინისტრაცია და აჭარის ტურიზმის დეპარტამენტი. პროექტი „ჰით ბათუმი“ სახელმწიფო პროექტს წარმოადგენს, რომლის მიზანია ერთის მხრივ აჭარის ტურისტული პოტენციალის, ხოლო მეორეს მხრივ მთლიანად ქვეყნის პრომოუშენი გარე და შიდა აუდიტორიაში.

0

ავტორი: