15:00:40 26-06-2015
სამმა პატიმარმა პროტესტის ნიშნად თვითდაზიანება მიიყენა
საქართველოს სასჯელაღსრულებისა და პრობაციის სამინისტროში ადასტურებენ, რომ სამი მსჯავრდებული, თვითდაზიანების გამო, კლინიკაში გადაიყვანეს.
კლინიკა "ლანცეტში" ამ დროისთვის რჩება გუშინ გადმოყვანილი ერთი პატიმარი, 26 წლის მამაკაცი, რომელსაც ჭრილობა მარჯვენა წინა მხარზე აქვს მიყენებული.
გუშინდელი ღამის განმავლობაში სასჯელაღსრულების დაწესებულებებიდან კლინიკა "ლანცეტში" გადმოყვანილია 7 პატიმარი, აქედან ერთ-ერთი ქალია.
კლინიკის მთავარი ექიმის ნინო ნადირაძის ინფორმაციით, შვიდი პაციენტიდან ერთს აღენიშნებოდა ჭრილობა, ხოლო მეორე შემთხვევაში საქმე ქონდა სიმაღლიდან ვარდნასთან. რაც შეეხება დანარჩენ 5 პაციენტს, ისინი სხვადასხვა დაავადებებს უჩივიან და საავადმყოფოში სწორედ ამ მიზეზით იყვნენ გადმოყვანილი.
„პრესა.ჯი“ საქართველოს სასჯელაღსრულებისა და პრობაციის სამინისტროს დაუკავშირდა სადაც ადასტურებენ, რომ სამი მსჯავრდებული, თვითდაზიანების გამო, კლინიკაში გადაიყვანეს.
პრესსამსახურის ცნობით, სამივე მსჯავრდებულის ჯანმრთელობის მდგომარეობა დამაკმაყოფილებელია და ისინი სამედიცინო პერსონალის მეთვალყურეობის ქვეშ იმყოფებიან.
"2015 წლის 25 ივნისს სასჯელაღსრულების N7 დაწესებულებიდან თვითდაზიანების გამო სამი მსჯავრდებული გ. ბ. გ. გ. და ბ. ო. კლინიკა „ლანცეტში“ გადაიყვანეს. ორი მათგანი ამ დროისთვის სასჯელაღსრულების დაწესებულებას უკვე დაუბრუნდა. მესამე მსჯავრდებული ჯერჯერობით კლინიკაში რჩება, თუმცა მისი ჯანმრთელობის მდგომარეობა სტაბილურია და სათანადო დოკუმენტაციის მომზადების შემდეგ ის დაუბრუნდება სასჯელის მოხდის ადგილს. სამივე მსჯავრდებულის ჯანმრთელობის მდგომარეობა დამაკმაყოფილებელია და ისინი იმყოფებიან სამედიცინო პერსონალის მეთვალყურეობის ქვეშ.
ოპერატიული ინფორმაციით, მოცემული მსჯავრდებულები კრიმინალური სუბკულტურისკენ არიან მიდრეკილები და თვითდაზიანება მიიყენეს მას შემდეგ, რაც მათ უარი ეთქვათ სხვა, სასურველ დაწესებულებაში გადაყვანაზე.
სასჯელაღსრულებისა და პრობაციის სამინისტროს გაფორმებული აქვს ხელშეკრულებები სხვადასხვა სამოქალაქო კლინიკასთან, სადაც, საჭიროების შემთხვევაში, ეტაპობრივად, ხდება მსჯავრდებულთა გადაყვანა და მკურნალობა, შესაბამისად, მსჯავრდებულთა რეფერალი ყოველდღიურ რეჟიმში ხორციელდება.
მსჯავრდებულები თავიანთი არალეგიტიმური მოთხოვნების დასაკმაყოფილებლად ხშირად მიმართავენ პროტესტის სხვადასხვა ფორმას და ამ გზით ცდილობენ ადმინისტრაციაზე გავლენის მოხდენას. სამინისტროს არაერთხელ განუცხადებია და ვიმეორებთ, რომ მსჯავრდებულის ერთი დაწესებულებიდან მეორეში გადაყვანის საკითხი სასჯელღასრულების ადმინისტრაციის პრეროგატივაა და ამ გადაწყვეტილებაში ვერ ჩაერევა ვერავინ, მათ შორის ვერც მსჯავრდებული",- აცხადებენ უწყებაში.
0