ნანა ჩარკვიანი - მამაჩემის ყველა სიმღერა, ყველა ფრაზა... ყველაფერი მიყვარს, რაც დატოვა

Presa.ge-ს დღევანდელი რესპოდენტი, მომღერალი ირაკლი ჩარკვიანის ქალიშვილი, ნანა ჩარკვიანია. იგი 12 წლისაა და ფიქრობს, რომ ჯერჯერობით , მოსაყოლი ბევრი არაფერი აქვს. უყვარს კერძების მომზადება, მათი დაგემოვნება და მეგობრებთან ერთად გართობა. ნანას ცხოვრებისა და ოცნებების შესახებ ჩვენი ინტერვიუდან შეიტყობთ.

-    ნანა, მოგვიყევი შენი ჰობის შესახებ. რას აკეთებ თავისუფალ დროს?

-    თავისუფალ დროს, ჩვეულებრივ, მეგობრებთან ვატარებ. ერთად ვმღერით, ვცეკვავთ, ვერთობით. Skateboard-ით სიარულს ვასწავლი მათ. სოციალურ ქსელზე შევდივარ და სასაცილო ვიდეოებს ვნახულობ. ამას გარდა, ანიმეს ყურება მიყვარს ძალიან. ხშირად ჩემი ოთახის ფანჯარასთან ვჯდები და ვფიქრობ...

-    როგორც ჩანს, მუსიკა ძალიან გიყვარს. რას უსმენ ძირითადად?

-    საყვარელი ჟანრებია Rock, Pop Rock, Grunge , Trip-hop . ვუსმენ Nirvana-ს,  Led Zeppelin-ს. Jimi Hendrix-სსა და Massive Attack-ს.

-    ნიჭიერში შენი გამოსვლა ბევრს ახსოვს. უნდა ველოდოთ თუ არა ნანას სხვა რომელიმე პროექტში?

-    არ ვიცი. ჯერჯერობით არაფერს ვგეგმავ. ცეკვასაც მგონი თავი დავანებე. ვნახოთ...

-    პროფესია ხომ არ გაქვს არჩეული, გაქვს გეგმები სამომავლოდ?

-    არა. ჩემთვის მომავალი საინტერესო არაა. აწმყოზე ფიქრი უმჯობესია, თუმცა მსახიობობა მინდა.

-    რას ნიშნავს შენთვის ირაკლი ჩარკვიანის შვილის სტატუსის ტარება?

-    სიმართლე გითხრათ, ეგ კითხვა არ მიყვარს.  რას უნდა ნიშნავდეს?! მამაჩემი ვინც უნდა ყოფილიყო და რა სტატუსიც უნდა ჰქონოდა მაინც ძალიან მეყვარებოდა.

-    გაქვს ირაკლის შემოქმედებიდან საყვარელი ფრაზა ან სიმღერა, რომელის კითხვა და მოსმენა არ მოგბეზრდება?

-    მისი ყველა სიმღერა , ყველა ფრაზა... ყველაფერი მიყვარს, რაც დატოვა.

-    როგორია გელა ჩარკვიანი, როგორც ბაბუ?

-    ბაბუ არაჩვეულებრივია. ბაბუური. მასწავლის ინგლისურს. მასთან გავიარე სახარება, მითოლოგია და ახლა გავდივარ ისტორიას. გელაში ის მიყვარს, რომ ჩემს ნაშრომს აფასებს და წასახალისებლად პრიზებსაც მიწესებს.

-    რომელია შენი ცხოვრების ერთ-ერთი გამორჩეული მომენტი?

-    ნამდვილად არ ვიცი, მაგრამ ვიცი რომელიც იქნება - როცა მე დავესწრები ჩემი საყვარელი მუსიკოსის Snoop Dog-ის კონცერტს.

-    ნანა, შენ ძალიან ბევრ ადამიანს უყვარხარ. მიუხედავად იმისა, გიცნობენ თუ არა ისინი. რას ეტყოდი მათ?

-    იყავით ბედნიერები, გაერთეთ, ისწავლეთ, წაიკითხეთ წიგნები და ეცადეთ ყველა გიყვარდეთ. 0

ავტორი: