13:36:01 07-11-2014
და მაინდ დაიშლება თუ არა უმრავლესობა პარლამენტში?
დაიშლება თუ არა პარლამენტში უმრავლესობა, თუ ფრაქცია "ქართული ოცნების" რიგებს დეპუტატები ჯაფარიძე-სამსახარაული-ფოფხაძე დატოვებენ. ეს კითხვა აქტუალობას ამ დრომდე არ კარგავს.
ხელისუფლებას უმრავლესობის შენარჩუნებისთვის სწორედ სამი კანონმდებელი სჭირდება. უმრავლესობის შექმნისთვის საჭირო 76 დეპუტატია, „თავისუფალი-დემოკრატების“ კოალიციიდან წასვლის შედეგად კი, „ქართულ ოცნებას“ 73 კანონმდებელი დარჩა.
"თავისუფალი დემოკრატების" ერთ-ერთი წევრის გედევან ფოფხაძის პოზიცია ამ დრომდე უცნობია.
დეპუტატი რამდენიმე წუთის წინ თბილისი მერიოტში ირაკლი ალასანიას შეხვდა. შეხვედრიდან გამოსული ფოფხაძე აცხადებს, რომ გადაწყვეტილება ჯერ არ მიუღია დ ამ ეტაპზე არც თავისუფალ დემოკრატებს ტოვებს და არც კოალიციას. საბოლოო გადაწყვეტილებას ის კონსულტაციების შემდეგ მიიღებს:
„ყველაფერს მოვიაზრებს ზოგადად, მაგრამ ამ კონკრეტულ შემთხვევაში ჯერჯერობით არაფერს არ ვამბობ იმიტომ რომ მე მაქვს შეხვედრები იმ ადამიანებთან ვის აზრსაც ანგარიშს ვუწევ, მიმაჩნია რომ ადამიანმა გადაწყვეტილება უნდა მიიღო მშვიდად, წყნარად და არა ასე მოწოლით და როცა მიკროფონებს გაჩრიან და აი ეხლა მოიფიქრე სწორი პასუხი.
იცი რას გეტყვი?! ერთი წუთი რომ მაქვს იმ რა სად როდისში ისაა პრობლემა, თორემ მე რომ ათი წუთი მქონდეს შეიძლება ყველა კითხვა გამოვიცნო , ამიტომ არ მინდა ასეთ ცაიტნოტში კამერების წინაშე ფიქრი. ფიქრის პროცესი არის ადამიანისთვის პრივატული და უნდა მისცე ადამიანს საშუალება ჩამოყალიბდეს...ყავას ვსვამდით მე და ირაკლი არაფერი არ ყოფილა",- განაცხადდა შეხვედრიდან გამოსულმა გედევან ფოფხაძემ.
პარლამენტში აცხადებენ, რომ მმართველ ძალას უმრავლესობის დაშლის თავიდან ასაცილებლად მეორე გეგმაც აქვს. ხელისუფლება უმრავლესობის შენარჩუნებას ყოფილი ნაციონალებით გეგმავს.
კერძოდ, კოალიციის ლიდერები აქტიურ კონსულტაციებს „ნაციონალური მოძრაობიდან“ წამოსულ დეპუტატებთან მართავენ, რომელთა შორის არის კახა ოქრიაშვილი.
საქართველოს პარლამენტის იურიდიულ საკითხთა კომიტეტის თავმჯდომარე არც პარლამენტში უმრავლესობის სტატისის დაკარგვას გამორიცხავს.ვახტანგ ხმალაძის განცხადებით, ყველაზე დიდი რაც შეიძლება მოხდეს, არის ის, რომ აღარ იარსებოს უმრავლესობის სტატუსის მქონე გაერთიანებამ.
"ქვეყანაში არც პოლიტიკური და არც საპარლამენტო კრიზისი არ არსებობს. შექმნილ ვითარებაში რაც ყველაზე ცუდი შეიძლება მოხეს ის არის, რომ პარლამენტში აღარ იარსებოს უმრავლესობის სტატუსის მქონე გაერთიანებამ უმრავლესობიდან "თავისუფალი დემოკრატების" გასვლა საპარლამენტო კრიზისს არ შექმნის. თუ ფრაქციათა ერთობაში პარლამენტის 76 წევრი იქნება – ასეთ შემთხვევაში შეიძლება შეიქმნას უმცირესობაც. თუ უმრავლესობა არ შეიქმნა, ვერ შეიქმნება უმცირესობაც. ასეთია რეგლამენტის მოთხოვნა. მე არ მგონია, რომ ასეთი ვითარება შეიქმნას და რომც შეიქმნას, არ არის პრობლემა, პარლამენტი იმუშავებს ჩვეულებრივად. ისევე როგორც დღეს ხდება მთელ რიგ საკითხებზე შეთანხმებების მიღწევა უმრავლესობის ფარგლებში ფრაქციებს შორის გაგრძელდება შეთანხმებები ფრაქციებს შორის, თუნდაც ისინი არ იყვნენ გაერთიანებული უმრავლესობაში. "თავისუფალი დემოკრატიების" ფრაქციასთან იქნება ძალიან მჭიდრო თანამშრომლობა. ვგულისხმობ არა მხოლოდ რესპუბლიკელების ფრაქციას, რომლებიც იდეოლოგიურად ახლოს არიან "თავისუფალ დემოკრატებთან", ასევე მათ ექნებათ თანამშრომლობა უმრავლესობაში შემავალ სხვა ფრაქციებთანაც", - განაცხადა ხმალაძემ.