10:59:34 16-02-2011
“დიდების ხეივანში” ალეკ ბოლდუინის ვარსკვლავი აკაშკაშდა
ჰოლივუდის “დიდების ხეივანს” კიდევ ერთი ვარსკვლავი შეემატა. ხეივანში, ამჯერად, ცნობილი მსახიობის, ალეკ ბოლდუინის ვარსკვლავი აკაშკაშდა. მოვლენამ მედიაში, ჩვეულებისამებრ, დიდი რეზონანსი გამოიწვია.
ბოლდუინს, თავისი 30 წლიანი კინოკარიერის მანძილზე, “ემის” ორი ქანდაკება, სამი “ოქროს გლობუსი” და ამერიკის კონომსახიობთა გილდიის ხუთი ჯილდო აქვს მიღებული. მსახიობი სამოცზე მეტ ფილმშია გადაღებული. წლების განმავლობაში, მისი პარტიორები ჰოლივუდის ყველაზე ნიჭიერი და ულამაზესი მსახიობები იყვნენ, მაგალითად, კიმ ბესინჯერი, მერილ სტრიპი და სხვები.
რაც მთავარია, ბოლდუინი, რეიტინგების მიხედვით, დღემდე ძალიან პოპულარული მსახიობია. “დიდების ხეივნის” “ახალი წევრი” იმითაც არის ცნობილი, რომ ცხოველების თავგამოდებული დამცველია, აქტიურად აპიარებს ვეგეტარიანელობას, მხარს უჭერს სხვადასხვა ბუნებისდამცველ ორგანიზაციებს და შემართებით იბრძვის ცხოველთა უფლებებისათვის. ეს საზოგადოებრივი აქტიურობა, პუბლიკის სიმპატიებს მსახიობისადმი ერთი-ორად ზრდის.
0