"ქართული ხმების" საიუბილეო კონცერტი ფილარმონიაში

1-ელ მარტს, 19:00 საათზე, ფილარმონიის დიდ საკონცერტო დარბაზში ანსამბლი "ქართული ხმების" სასცენო მოღვაწეობიდან 15 წლის საიუბილეო კონცერტი და CD-ალბომის პრეზენტაცია გაიმართება.

2013 წელს ანსამბლი "ქართული ხმების" ახალ თაობას სასცენო მოღვაწეობის 15 წელი შეუსრულდა. ანსამბლმა საიუბილეო თარიღთან დაკავშირებით ახალი ალბომი გამოსცა, რომლის საჯარო პრეზენტაცია კონცერტის სახით 1-ელ მარტს, თბილისის კულტურული ღონისძიებების ცენტრის მხარდაჭერით, დიდ საკონცერტო დარბაზში გაიმართება.

პროექტზე ანსამბლის წევრები "ბრავო რექორდსში" ორი წლის განმავლობაში მუშაობდნენ.

გრანდიოზული სოლო-კონცერტისათვის "ბრავო რექორდსში" მიმდინარეობს ანსამბლის რეპეტიციები და კონცერტის წინამოსამზადებელი სამუშაოები. კონცერტზე შესრულდება 15 მუსიკალური ნომერი ახალი ალბომიდან, სიმფონიური ორკესტრისა და "ბრავო ბენდის" თანხლებით. "ქართული ხმების" გარდა, მონაწილეობას მიიღებენ: ნიაზ დიასამიძე, რომა რცხილაძე, სალომე ბაკურაძე და ზვიად ბოლქვაძე. კონცერტის რეჟისორი: ბაკურ ბაკურაძე.

რადგანაც ახალი ალბომი საიუბილეო თარიღს ეძღვნება, მასში შედის ყველა იმ ჟანრის ნაწარმოები, რომელშიაც უმუშავიათ ჯგუფის წევრებს მთელი ამ ხნის განმავლობაში. მუსიკალური ნაწარმოებები ორ დისკზეა გადანაწილებული.

პირველ დისკზე თავმოყრილია ქართული ხალხური სიმღერების, ხოლო მეორეზე სრულიად ახალი სასიმღერო კომპოზიციების და ასევე, საყოველთაოდ ცნობილი და პოპულარული ჰიტების აბსოლუტურად ექსპერიმენტული, განსხვავებული ვოკალური და ინსტრუმენტული არანჟირებით შექმნილი ვერსიები. ამ ალბომის სახით "ქართული ხმების" თაყვანისმცემლებს ნამდვილი მუსიკალური სიურპრიზი ელით.

"ქართული ხმები" უამრავი საერთაშორისო მუსიკალური ფესტივალის მონაწილე და გრანპრის მფლობელია, ასევე, არაერთი საქველმოქმედო კონცერტის ინიციატორი და მონაწილე. ანსამბლის წევრები დაჯილდოებულნი არიან ღირსების ორდენებით.

15 წლის განმავლობაში ანსამბლს საინტერესო თანამშრომლობა ჰქონდა მსოფლიო დონის ისეთ მუსიკოსებთან, როგორებიც არიან: Bobby McFerrin, ქეთი მელუა, TAKE 6 და ა.შ. 2006 წელს ანსამბლის ბაზაზე შეიქმნა საბავშვო სტუდია, სადაც ასეულობით მოზარდი ეზიარა ქართულ ხალხურ სიმღერას. გამოცემული აქვთ ოთხი CD და ორი DVD-ალბომი, რომლებიც დღემდე ერთ-ერთ გაყიდვად ალბომებად ითვლება.

1-ლი მარტიდან ანსამბლ "ქართული ხმების" ახალი CD-ალბომის შეძენა შესაძლებელი იქნება "ბრავო რექორდსის" სადისტრიბუციო ქსელის მაღაზიებში. 0

ავტორი: