10:54:59 22-01-2013
ლადო ბედუკაძის ნაწამები პატიმარი წულუკიანს მის დასჯას სთხოვს!
19 იანვარს, სასამართლომ პროკურატურის შუამდგომლობა დააკმაყოფილა და და ვლადიმერ ბედუკაძე, 2 ათასი ლარის გირაოს სანაცვლოდ, დარბაზიდან გაათავისუფლა. ,,ციხის კადრების’‘ ავტორმა გირაოს თანხა 10 დღის ვადაში უნდა გადაიხადოს.
,,გამოძიებასთან ვითანამშრომლებ და მადლობელი ვარ მთავარი პროკურორის, არჩილ კბილაშვილისა და იუსტიციის მინისტრის, თეა წულუკიანის,’‘ - განაცხადა სასამართლო დარბაზიდან გათავისუფლებულმა ბედუკაძემ. როგორც ჩანს, ბედუკაძესთან წულუკიანი და მისი „მეოცნებე“ კოლეგები ფრიად არინ დავალებულნი. სხვა თუ არაფერი, ბედუკაძე ნიჭიერი რეჟისორი გამოდგა და საკნებში „ცოცხების ინსცენირება“ მშვენივრად დადგა. ამის საპასუხოდ კი წულუკიან-კბილაშვილმა მას ძველი ცოდვები უპრობლემოდ ჩამოაწერეს. თუმცა , შესაძლოა, საქმის მასალებიდან ეს ფაქტები ამოშალო, მაგრამ პატიმრების გონებიდან და მეხსიერებიდან ხომ ვერ ამოშლი, როგორ აწამებდა ბედუკაძე ციხის პატიმრებს?!
ერთ-ერთი მათგანი პოლიციელის მკვლელობის ფაქტზე გასამართლებული რატი რეხვიაშვილია. რატი რეხვიაშვილის დედა, მარინა რეხვიაშვილი უკვე კარგა ხანია ამაოდ ითხოვს იუსტიციის მინისტრ, თეა წულუკიანთან შეხვედრას. წულუკიანი დაზარებულის დედასთან შეხვედრას თავს არიდებს. არა და მარინა რეხვიაშვილი შეხვედრის სურვილს საჯაროდ აფიქსირებს, თუმცა წულუკიანი ქართული მულტფილმის იმ ლომის პოზაშია, აბა ჩემს შვილს ხომ ვერ მოვჭრი თავსო?! ბედუკაძისგან გამწარებულ ქალბატონს რომელიღაც პროკურორ კოჭლამაზაშვილთან ამისამართებს.
მარინა რეხვიაშვილი - პატიმრის დედა პრესაში იმ სისასტიკის შესახებ წერს, რასაც ბედუკაძე პატიმრების მისამართით იჩენდა: ,, რატიმ ციხიდან გამომიგზავნა წერილი, რომლის გასაჯაროებაც თავად მოითხოვა. მასში აღწერილია, თუ როგორ არაადამიანურად აწამებდა ლადო ბედუკაძე ჩემს შვილს 7 თვის განმავლობაში და ე.წ. საქათმეში შესვლას აიძულებდა. რატის უარი რომ უთქვამს, ბედუკაძეს მისთვის მთელი ტანი დანით დაუსერავს, შემდეგ კი, ჭრილობებზე მარილი დაუყრია... რამდენიმე დღის წინ კი, ვიგებ, რომ ბედუკაძეს ძებნილის სტატუსი მოუხსნეს და თბილისში ჩამოვიდა. გეკითხებით: მე, როგორც ბედუკაძის მიერ ნაწამები პატიმრის დედას, მაქვს თუ არა უფლება, რომ ჩემი შვილის მწამებლების დასჯა მოვითხოვო? რატის აქვს თუ არა უფლება, იმ ადამიანის, რომელიც მას ,,საქათმეში’‘ შესვლასა და საზიზღრობების ჩადენას აიძულებდა, დასჯა მოითხოვოს? “
პატიმრის დედა იმასაც აცხადებს, რომ ბედუკაძემ ცნობილი ციხის კადრები იმისთვის გამოამზურა, რომ თავი გადაერჩინა და მას პატიმრების ბედი არ ანაღვლებს. მარინა რეხვიაშვილი წულუკიანისა და კბილაშვილისგან სასწრაფო რეაგირებას ითხოვს, წინააღმდეგ შემთხვევაში აცხადებს, რომ ბედუკაძეს თუ კანონის ძალით არ დასჯიან, მე ჩემს ქმედებაზე პასუხს არ ვაგებო!
0