რუსიშვილი ზურა ტარყაშვილის მკვლელობაში დამნაშავედ სცნეს - რა ხდებოდა სასამართლოზე

„ადვოკატებმა რუსიშვილი საბოლოოდ დაღუპეს“ - ასეთი იყო სასამართლოს დარბაზში მყოფი სრულიად უცნობი პირების შეფასება მას შემდეგ, რაც ნაფიცმა მსაჯულებმა განსასჯელი დავით რუსიშვილი დამნაშავედ სცნეს 2011 წლის 17 ოქტომბერს, 23 წლის ზურაბ ტარყაშვილის განსაკუთრებული სისასტიკით, წინასწარ განზრახვით, ჯგუფურად ჩადენილ მკვლელობაში.

მანამდე კი, განსასჯელ რუსიშვილის ადვოკატს, გელა ნიკოლაიშვილს, დასკვნითი სიტყვით გამოსვლის დროს, მოსამართლე ვაჟა ფუხაშვილმა საჯაროდ მისცა შენიშვნა, მისი დაცვის ქვეშ მყოფის საწინააღმდეგო განცხადებების გამო. „თქვენ არ გაქვთ უფლება, ისაუბროთ თქვენივე დაცვის ქვეშ მყოფი დავით რუსიშვილის წინააღმდეგ“, - მიმართა მოსამართლემ ადვოკატ ნიკოლაიშვილს. 

ნებისმიერ ქვეყანაში, ასეთი ფაქტი, ალბათ, საბოლოოდ დაასამარებდა ადვოკატ ნიკოლაიშვილის კარიერას. თუმცა, ეს ის შემთხვევაა, როცა ადვოკატებმა განსასჯელ რუსიშვილს უბიძგეს, რათა მას არა ლოალური, არამედ უმკაცრესი სასჯელი მიეღო (რუსიშვილმა თავდაპირველად დანაშაული აღიარა, მაგრამ ადვოკატების რჩევით ჩვენება შეცვალა).

2011 წლის 17 ოქტომბერს, რუსთაველის გამზირზე ზურა ტარყაშვილის მკვლელობის გამო დღემდე სამი პირია ბრალდებული. ნარკოტიკების მოხმარებისთვის გასამართლებული დავით რუსიშვილი, ყაჩაღობისთვის გასამართლებული ირაკლი აგლაძე და ნარკოტიკების მოხმარებისთვის მსჯავრდებული ივერი გოგბერაშვილი.

სამართალდამცველებმა, ბრალდებული პირებიდან ჯერჯერობით ორი, დავით რუსიშვილი და ივერი გოგბერაშვილი დააკავეს. თუმცა, იმის გამო, რომ კიევში დაკავებული გოგბერაშვილის საქართველოში ჩამოყვანა დღემდე ვერ მოხერხდა, ჯერ მხოლოდ რუსიშვილი წარსდგა სასამართლოს წინაშე.

მიუხედავად ამისა, ტარყაშვილის მკვლელობის საქმის ძიება კვლავ გრძელდება და გამოძიების ინფორმაციით, არაა გამორიცხული, რომ რამდენიმემ კიდევ გაიზიაროს რუსიშვილ-გოგბერაშვილ-აგლაძის ბედი, მათ შორის ძებნილმა დავით ჯოხაძემაც.

„ზურა ტარყაშვილის მკვლელობაში დავით ჯოხაძეც მონაწილეობდა“, - ეს სიტყვები სასამართლოზე რუსიშვილის მეორე ადვოკატმა, თეიმურაზ მაგრაქველიძემ წარმოსთქვა. უნდა ითქვას, რომ ადვოკატი მაგრაქველიძე, მთელი პროცესის მსვლელობისას, უფრო ძებნილ დავით ჯოხაძის ტარყაშვილის მკვლელობაში დადანაშაულებით იყო დაკავებული, ვიდრე რუსიშვილის დაცვით...

რა ხდებოდა სასამართლოზე?

მოწმე გია გაზდელიანმა სასამართლოზე განაცხადა, რომ პირადად დაინახა თუ როგორ მისდევდნენ სროლით უიარაღო ზურა ტარყაშვილს ირაკლი აგლაძე, ივერი გოგბერაშვილი და დავით რუსიშვილი. „ჩემ თვალწინ არაადამიანურად, მხეცურად მოკლეს... დავით რუსიშვილმა მეც მესროლა...“, - თქვა გაზდელიანმა.

მოწმე გიორგი ბარათელიც შეესწრო ტარყაშვილის მკვლელობას რუსთაველზე... „შოკში ვიყავი, ვერ წარმომედგინა რომ დღისით, ასეთი რამ შეიძლებოდა მომხდარიყო. მკვლელების სახეებს რა დამავიწყებს?

ზურა ტარყაშვილი მოკლეს: დავით რუსიშვილმა, ივერი გოგბერაშვილმა და ირაკლი აგლაძემ, მე სამივე ამოვიცანი“, - ასეთი იყო ბარათელის ჩვენების პათოსი. ბარათელმა, ტარყაშვილის მკვლელობაში სხვა პირების მონაწილეობაც არ გამორიცხა...

მოწმე ხათუნა მუკბანიანმა პროცესზე გაიხსენა თუ როგორ გაეკიდნენ იარაღმომარჯვებული დავით რუსიშვილი, ივერი გოგბერაშვილი და ირაკლი აგლაძე ზურა ტარყაშვილს და როგორ მოკლეს იგი, რუსთაველზე.

„მე კარგად ვიცნობ დავით რუსიშვილსა და ივერი გოგბერაშვილს. როცა ზუკას მისდევდნენ, ეს ცივსისხლიანები სროლით, ჩემი თვალით დავინახე ყველაფერი. უთვალთვალებდნენ და გეგმავდნენ ზუკას მკვლელობას. ვყვიროდი, შველას ვითხოვდი, მაგრამ ამათ რა გააჩერებდათ? უდანაშაულო ზუკა სადისტურად მოკლეს... არ დამავიწყდება დავით რუსიშვილის სახე...“.

სასამართლოზე დაიკითხნენ მოკლული ზურა ტარყაშვილის და და დედაც. გარდაცვლილის დამ, ეკა ტარყაშვილმა განაცხადა: „ზუკა ხულიგნობისთვის იყო დაკავებული და 2 წელი ჰქონდა მისჯილი.

როცა ციხიდან გამოდიოდა, ჩვენ მის დასახვედრად მივედით. მაშინაც კი, 2011 წლის 4 ოქტომბერს, ციხესთან ირაკლი აგლაძე და დავით რუსიშვილი უთვალთვალებდნენ. ჩემი თვალით დავინახე.

ალბათ იქვე გეგმავდნენ ზუკას მკვლელობას, მაგრამ ჩვენ ბევრნი ვიყავით და ვერ გაბედეს. რუსიშვილი მანქანაში იჯდა და როცა შეგვამჩნიეს, თავზე „კაპიშონი“ წამოიხურა. ჩემი ძმა ჩემ თვალწინ მოკლეს, ხელში ჩამაკვდა“, - ჰყვებოდა ცრემლიანი ეკა ტარყაშვილი სასამართლოზე.

თუმცა, განსაკუთრებით ემოციური და ტრაგიკული იყო მოკლულის დედის, თამილა კოჭლამაზაშვილის გამოსვლა სასამართლო პროცესზე. როცა ქალბატონი თამილა იმ ტრაგიკულ დღეს იხსენებდა დარბაზში დიდი უმრავლესობა უბრალოდ, ტიროდა. დაცვის წევრების ჩათვლით...

„ზუკას ვერ ვუშველეთ, როცა დავინახე ჩემი შვილი, სისხლის გუბეში, ჯერ კიდევ მქონდა იმედი. ვლოცულობდი რომ გადარჩენილიყო... სასწრაფო დახმარების ექიმებმა მანქანაში ჩასვეს. წაიყვანეს, მაგრამ იქვე გაჩერდნენ და მივხვდი, რომ უკვე აღარ იყო ზუკა... 2011 წლის 17 ოქტომბრის შემდეგ მე აღარ ვცხოვრობ, მე ვარსებობ. ღმერთს ვთხოვ რომ არ დამსაჯოს ხანგრძლივი სიცოცხლით...

დიახ, მე დავინახე თუ როგორ ელოდებოდნენ ციხესთან მოსაკლავად ჩემ შვილს, ირაკლი აგლაძე და დავით რუსიშვილი, რომელმაც ჩვენ დანახვაზე თავზე რაღაც წამოიფარა. თუმცა, მაშინ ვერ გაბედეს...

როცა ზუკა გამოვიდა 4 თვით ადრე და იმ დღეს - 2011 წლის 17 ოქტომბერს, პრობაციაზე ჩავედით (პირობითი ჰქონდა რამდენიმე თვე), გვითხრეს რომ ვიღაც დავით რუსიშვილმა იკითხა და აინტერესებდა თუ როდის უწევდა პრობაციაზე მისვლა ზუკას... პრობაციის თანამშრომელმა ისიც გვითხვა, რომ მანამდე ზუკას ირაკლი აგლაძეც კითხულობდა...

ვერ მოვასწარით რეაგირება. სახლში, ლაღიძის ქუჩაზე ამოვედით, დახვდნენ და მხეცურად მოკლეს. ვთხოვ ნაფიც მსაჯულებს, დასაჯონ მკვლელი, რათა სხვა დედას მაინც აღარ ჩააცვას შავები“.

სასამართლოზე დაიკითხა ექსპერტიც, რომელმაც აღწერა თუ როგორ ჩაატარა ექსპერტიზა დავით რუსიშვილის ტანსაცმელზე. უკვე დამნაშავედ ცნობილი რუსიშვილის შარვალსა და მაისურზე კი დენთის კვალი აღმოჩნდა. „ასეთი კვალი მხოლოდ მაშინ რჩება ტანსაცმელზე, თუ ცეცხლსასროლ იარაღს გაისვრიან“...

სასამართლოს მიმდინარეობისას გაირკვა, რომ მკვლელობის დღეს, დავით რუსიშვილს, პირადი მობილურიდან მკვლელობის მთავარ ორგანიზატორთან, ივერი გოგბერაშვილთან 12-ჯერ ჰქონდა ნასაუბრები...

პირველად რუსიშვილმა მაშინ დაურეკა გოგბერაშვილს, როცა პრობაციაზე მივიდა (მას პირობითი ჰქონდა) და ტარყაშვილი იკითხა... (პრობაციის თანამშრომელმა ეს სასამართლოზე, ჩვენებითაც დაადასტურა) ხოლო, მეთორმეტედ რუსიშვილ-გოგბერაშვილის სატელეფონო საუბარი მკვლელობამდე 3 წუთით ადრე, 15 საათსა და 9 წუთზე შედგა. 

აღსანიშნავია ისიც, რომ ამ საუბრის შემდეგ, გოგბერაშვილმა და რუსიშვილმა ტელეფონები გათიშეს (დეტალური ამონაწერის მიხედვით, მათ ტელეფონებზე, მკვლელობის შემდეგ შემავალ-გამავალი ზარი აღარ დაფიქსირებულა).

საინტერესო დეტალი: ამ ფაქტს სადავოს არ ხდიან რუსიშვილის ადვოკატებიც. უფრო მეტიც, განსასჯელ რუსიშვილის ადვოკატი, გელა ნიკოლაიშვილი, მკვლელობის დღეს, რუსიშვილ-გოგბერაშვილს შორის 12 სატელეფონო ზარს, „ძალიან საეჭვოს უწოდებს“... ხოლო პირად საუბრებში მორცხვად ამბობს: „რუსიშვილს ვიცავ? მე ადვოკატი ვარ და აბა რა უნდა ვთქვა სხვა... რუსიშვილს არ ახსოვს თუ რაზე ესაუბრა გოგბერაშვილს მკვლელობის დღეს - 12-ჯერ“...

უნდა ითქვას, რომ განსასჯელ რუსიშვილის ოთხივე ადვოკატი (ერთს მთელი პროცესის მანძილზე ხმაც კი არ ამოუიღია), ძალიან სუსტად და არაკვალიფიციურად გამოიყურებოდა.

მათ სასამართლოზე ვერ წარმოადგინეს ვერც ერთი დამამტკიცებელი არგუმენტი საიმისოდ, რომ რუსიშვილი დაეცვათ. ხოლო ფარატინა განცხადებებმა „უდანაშაულო ახალგაზრდის“ შესახებ, რუსიშვილს განსაკუთრებულად მკაცრი სასჯელი მოუტანა: ცნობილ იქნას დამნაშავედ დავით რუსიშვილი ზურა ტარყაშვილის განზრახ, ჯგუფურად, განსაკუთრებული სისასტიკით ჩადენილ მკვლელობაში...

მკვლელობის მოტივი

სახელმწიფო ბრალმდებლის თქმით, 2010 წლის მარტში, ზურა ტარყაშვილს შელაპარაკება მოუვიდა სანდრო გოგბერაშვილთან. გოგბერაშვილმა, ტარყაშვილს იარაღი დაადო თავზე, მას ტარყაშვილის მეგობრებმა იარაღიანი ხელი დააწევინეს, რა დროსაც სანდრო გოგბერაშვილმა რამდენჯერმე გაისროლა.

„ამ სროლის ხმაზე, გრიბოედოვის ქუჩაზე მდებარე „არკაში“ (სადაც სანდრო გოგბერაშვილი და ზურა ტარყაშვილი იმყოფებოდნენ) შევარდა სანდრო გოგბერაშვილის მეგობარი, თორნიკე კაჭარავა (იმ მომენტში გათიშული იყო ელექტროენერგია, წვიმდა, ბნელოდა) და რამდენიმე გასროლა განახორციელა.

კაჭარავას მიერ გასროლილი ტყვიით დაიჭრნენ ზურა ტარყაშვილი, დავით და ლევან ჩიჩუები... თორნიკე კაჭარავას მიერ გასროლილი ტყვია შემთხვევით მოხვდა მისივე მეგობარ სანდრო გოგბერაშვილსაც, რომელიც გარდაიცვალა.

ყველასათვის ცნობილი გახდა, რომ სანდრო გოგბერაშვილი მოკლა მისივე მეგობარმა, თორნიკე კაჭარავამ (მიმალვაში მყოფ თორნიკე კაჭარავას წაუყენეს სანდრო გოგბერაშვილის მკვლელობა, დაუსწრებლად გაასამართლეს და 24 წელი მიუსაჯეს).

ის, რომ კაჭარავამ მოკლა სანდრო გოგბერაშვილი, ექსპერტიზამაც დაადასტურა. დადგინდა რომ: ტარყაშვილისა და ჩიჩუების სხეულიდან ამოღებული ტყვია იდენტური იყო გოგბერაშვილის სხეულიდან ამოღებული ტყვიისა. თუმცა, მიუხედავად ამისა, ეს არ აღმოჩნდა შემაკავებელი ფაქტორი სანდრო გოგბერაშვილის მამისთვის.

ივერი გოგბერაშვილმა, დავით რუსიშვილთან, ირაკლი აგლაძესთან და სხვა პირებთან ერთად საფლავზე დაიფიცა, რომ მოკლავდა ყველას, რომელიც მისი შვილის მკვლელობის მომენტში, მკვლელობის ადგილზე იმყოფებოდა.

ივერი გოგბერაშვილმა, დავით რუსიშვილმა, ირაკლი აგლაძემ, სხვებმა, იცოდნენ რომ ზურა ტარყაშვილს არ მოუკლავს სანდრო გოგბერაშვილი. იცოდნენ, რომ ზურა ტარყაშვილი უდანაშაულო იყო.. იცოდნენ, რომ სანდრო გოგბერაშვილი მოკლა თორნიკე კაჭარავამ, მაგრამ მათ მაინც გადაწყვიტეს ზურა ტარყაშვილის მკვლელობა, რადგან იმ მომენტში იქ იყო“, - განაცხადა ბრალმდებელმა შოთა ტყეშელაშვილმა სასამართლო პროცესზე.

აღსანიშნავია, რომ თავდაპირველად დავით რუსიშვილმა აღიარა ზურა ტარყაშვილის მკვლელობა, დაასახელა მკვლელობაში მონაწილე სხვა პირებიც: ირაკლი აგლაძე, ივერი გოგბერაშვილი... მოგვიანებით კი ჩვენება შეცვალა და განაცხადა, რომ უდანაშაულო იყო. თუმცა, დღეს, ნაფიცმა მსაჯულებმა დავით რუსიშვილს უმკაცრესი განაჩენი გამოუტანეს - ცნობილ იქნას დამნაშავედ...

ხვალ, სასამართლო, რუსიშვილის მიერ განსაკუთრებული სისასტიკით და ჯგუფურად ჩადენილი მკვლელობის გამო, სასჯელის ზომის შესახებ იმსჯელებს... სწორედ ხვალ გაირკვევა, თუ რამდენ წელს მიუსჯიან ზურა ტარყაშვილის მკვლელობისთვის ნაფიცი მსაჯულების მიერ დამნაშავედ ცნობილ რუსიშვილს.

0

ავტორი: