14:40:23 11-06-2012
მარიონეტულ ხელისუფლებას იზოლატორიდან სამი დაკავებული გაექცა
სეპარატისტულ აფხაზეთში კრიმინოგენური სიტუაცია რომ უკიდურესად გამწვავებულია, კარგადაა ცნობილი. მარიონეტული ხელისუფლების სამართალდამცველი ორგანოები ისე კარგად „მუშაობენ“, პატიმრის იზოლატორიდან კოლონიაში გადაყვანაც კი ვერ უზრუნველუყვიათ.
სააგენტო „აფსნიპრესის“ მიერ 10 ივნისს გავრცელებული ინფორმაციით, წინასწარი დაკავების იზოლატორიდან დრანდის ციხეში გადაყვანისას სამი განსაკუთრებით საშიში დამნაშავე გაექცათ. ამავე სააგენტოსვე ცნობით, გაქცევისას მათ ორი მამაკაცი და ერთი ქალი მძიმედ დაჭრეს.
რუსული სააგენტო „ლაიფნიუსის“ ცნობით კი, გაქცეულები არიან ძმები ბადრი და ბაჩო ხაზალიები და ასევე ბიძინა ხასია. როგორც ეს სააგენტო იტყობინება, გაქცეული ძმებიდან თითოეულს 19–იანი თავისუფლების აღკვეთა ჰქონდათ მისჯილი სასჯელის მკაცრი რეჟიმის კოლონიაში მოხდით.
მათ ბრალად ედებოდათ 2009 წლიდან 2011 წლის ჩათვლით გალის რაიონში განსაკუთრებით მძიმე დანაშაულობების ჩადენა – ყაჩაღური თავდასხმები და და ადამიანების გატაცება. რაც შეეხება მესამე გაქცეულს, სააგენტოს ინფორმაციით, იგი ზუგდიდის რაიონის სოფელ გრიგოლიშის მკვიდრი ბიძინა ხასიაა, რომელსაც მდინარე ენგურზე ე.წ. საზღვრის უკანონოდ გადაკვეთის გამო 11 წლითა და 6 თვით თავისუფლების აღკვეთა ჰქონდა მისჯილი სასჯელის მკაცრი რეჟიმის კოლონიაში მოხდით.
სოხუმის მარიონეტული რეჟიმის „გენპროკურატურიდან“ „აფსნიპრესისთვის“ მიწოდებული ინფორმაციით, გაქცევა მოხდა დაუდგენელი სისტემის იარაღის გამოყენებით, რომლითაც გაქცეულები დაემუქრნენ დროებითი დაკავების იზოლატორის თანამშრომლებს. ამასთან მათ დანით დაჭრეს იზოლატორის თანამშრომელი სასრიყუა კოვე, რომელიც შემდგომში სოხუმის რესპუბლიკურ საავადმყოფოში გადაიყვანეს და როგორც იტყობინებიან, მის სიცოცხლეს საფრთხე არ ემუქრება.
„გენპროკურატურისავე“ ცნობით, გაქცევის შემდეგ მიმალვის მიზნით, ძმებმა ხაზალიებმა და ხასიამ სცადეს მანქანა წაერთმიათ ვინმე ადამირ მირცხულავასთვის, თუმცა, იგი მათ არ დამორჩილდა და შედეგად ის და მანქანაში მყოფი მისი ნათესავი ემა შოუა ცეცხლსასროლი იარაღიდან გასროლით დაჭრეს. თუმცა, არც მათ სიცოცხლეს ემუქრება საფრთხე. ამის შემდეგ გაქცეულებმა იარაღის გამოყენებით, მოქალაქე მიხეილ სარაევს იარაღის მუქარით ავტომანქანა „მერსედესი“ წაართეს, მაგრამ გულრიფშის რაიონში ხეს შეეჯახნენ და გაიქცნენ. ამჟამად გაქცეულთა დაკავებისა და მოძიების მიზნით, გამოცხადებულია ოპერაცია „პერეხვატი“. თუმცა გაქცეულთა კვალს ჯერჯერობით ვერ მიაგნეს.
0