08:50:57 29-05-2012
გიორგი ბარამია: გალში მომხდარი მკვლელობა, კლანთა შორის დაპირისპირებას უკავშირდება
აფხაზეთის მთავრობის თავმჯდომარემ, გიორგი ბარამიამ ოკუპირებულ გალის რაიონში კრიმინალური გარჩევის შედეგად მომხდარ მკვლელობასთან დაკავშირებით კომენტარი გააკეთა და აღნიშნულ ფაქტს საოკუპაციო პოლიტიკის გაგრძელება უწოდა.
გიორგი ბარამიას განცხადებით, დღევანდელი სიტუაცია ოკუპირებულ აფხაზეთში, იმ საოკუპაციო პოლიტიკის გაგრძელებაა, რასაც რუსეთი ამ რეგიონში ახორციელებს.
"რაც შეეხება დღვანდელ ფაქტს, ეს არის მორიგი კრიმინალური გარჩევა და კლანთა შორის დაპირისპირება. სამწუხაროდ, ასეთი შემთხვევებს არაერთხელ ჰქონდა ადგილი ოკუპირებულ რეგიონებში და სწორედ ეს არის რუსეთის საოკუპაციო პოლიტიკის შედეგი,” - განაცხადა აფხაზეთის მთავრობის თავმჯდომარემ.
დღეს, ოკუპირებულ გალის რაიონში, მილიციის ორი თანამშრომელი და ერთი ადგილობრივი მოსახლე მოკლეს. კაფე "ზოლუშკაში", ჯერჯერობით დაუდგენელი ორი პირი შეიჭრა და "კალაშნოკოვის" ტიპის ცეცხლსასროლი იარაღიდან უმისამართოდ გახსნა ცეცხლი, რის შედეგად ადგილზე გარდაიცვალნენ მილიციელები: ლეონიდ კვიცინია და დევი ბუავა, ასევე, ადგილობრივი მკვიდრი - გულთაზ ყოლბაია.
მომხდართან დაკავშირებით აღძრულია სისხლის სამართლის საქმე და მიმდინარეობს გამოძიება.