12:16:40 22-05-2012
რუსი გამომძიებლები დუმბაძის მკვლელებს მალავენ?
გაზეთი „იზვესტია“ მოსკოვში მოკლული ყოფილი ქართველი გენერლის მკვლელობის არაოფიციალურ და ოფიციალურ ვერსიებზე წერს. როგორც ირკვევა, ორივე მათგანში ფიგურირებს ე.წ. „ქართული კვალი“.
„იზვესტია“ იუწყება, რომ გამომძიებლები რამდენიმე ვერსიას ამუშავებენ და „მათ შორის, პრიორიტეტულია ის, რომ დუმბაძეს, შესაძლოა, ქართული სპეცსამსახურები გაუსწორდნენ“.
სამარათალდამცავ ორგანოებზე დაყრდნობით სხვა რუსული გამოცემებიც წერენ, რომ „გამოძიება ამოწმებს დანაშაულის სხვადასხვა ვერსიებს, მათ შორის, დუმბაძის ძველ საქმიანობასთან დაკავშირებით“.
ამ თემაზე დაკავშირებული სტატიებიდან გამომდინარე, რომლებიც რუსულ მედიაში დაიბეჭდა, გამოდის რომ რუსეთი საქართველოს სპეცსამსახურების წარმომადგენლებით ყოფილა სავსე, თანაც, ისე, რომ ამის შესახებ ექსპერტებმა და ჟურნალისტებმაც კი იციან, ისევე როგორც დუმბაძის მეგობრებმა - თენგიზ კიტოვანმა და ვლადიმერ ხომერიკმა, რომელთა კომენტარებიც მკვლელობიდან ძალიან მალევე გავრცელდა და რომლებიც, პირდაპირ სააკაშვილის „აგენტურულ ქსელს“ ადებენ ხელს.
საყურადღებო სწორედ ისაა, რომ გამომძიებლებმა, რომლებმაც მომხდარიდან რამდენიმე საათში არ შეიძლება იცოდნენ მკვლელობის ზუსტი მოტივი, მონაწილისა და დამკვეთის ვინაობა, აპრიორი, წინასწარ აცხადებენ, რომ "დუმბაძის მკვლელობის საქმეში ქართული კვალი ფიგურირებს". ეს კი, ექსპერტთა აზრით, მიანიშნებს იმაზე, რომ რუსი სამართალდამცველები შესაძლოა მკვლელობის ნამდვილ მოტივს, შემსრელებელსა და დამკვეთს მალავდნენ...
თუმცა, ვიდრე „ქართველ აგენტებს“ იპოვიან, რუსულმა მილიციამ უკვე დაადგინა, რომ დუმბაძე პსმ სისტემის პისტოლეტითაა მოკლული, საიდანაც 7-ჯერ გაისროლეს. ყოფილ გენერალს ჭრილობები თავისა და მუცლის არეში აქვს მიღებული და ის ადგილზევე, სასწრაფო დახმარების მისვლამდე გარდაიცვალა.
1956 წელს დაბადებული რომან დუმბაძე აჭარის ავტონომიური რესპუბლიკის ლიდერის ასლან აბაშიძის პერიოდში ბათუმში განთავსებულ საქართველოს თავდაცვის სამინისტროს 25-ე ბრიგადას მეთაურობდა.
ვარდების რევოლუციის შემდეგ აჭარაში განვითარებული მოვლენების დროს რომან დუმბაძემ უარი თქვა დამორჩილებოდა საქართველოს მთავარსარდალს და განაცხადა, რომ ის მხოლოდ ასლან აბაშიძის ბრძანებებს შეასრულებდა. დუმბაძე სამშობლოს ღალატის მუხლით 2004 წელს დააკავეს და 17 წლით თავისუფლების აღკვეთა მიუსაჯეს, თუმცა 2008 წლის აგვისტოს ომის შემდეგ რუსეთმა მისი გაცვლა მოითხოვა და სანაცვლოდ ქართულ მხარეს ომის დროს დატყვევებული 12 სამხედრო გადმოსცა.
წყარო
0