17:59:23 21-05-2012
მოსკოვში, ექს-გენერალი დუმბაძე შეკვეთილი მკვლელობის მსხვერპლი გახდა
მოსკოვში ყოფილი ქართველი გენერალი რომან დუმბაძე მოკლეს - იუწყება რუსული მედია.
ბათუმის 25-ე ბრიგადის ექს-მეთაურის სიკვდილის სამართალდამცავი ორგანოებიც ადასტურებენ. მათი ინფორმაციით, ინცინდენტი დღეს დღისით მოხდა, რუბლიოვსკის გზაზე, №30 სახლის რაიონში. გამოძიების ვერსიით, დუმბაძეს ცეცხლსასროლი იარაღიდან ორმა უცნობმა მამაკაცმა ესროლა, რის შემდეგაც ისინი მოტოციკლით მიიმალნენ. შემთხვევის მოწმე გახდა გოგონა, რომლისთვისაც ქილერებს ხელი არ უხლიათ. დანაშაულის ხასიათი მოწმობს იმას, რომ ადგილი ჰქონდა შეკვეთილ მკვლელობას - წერენ რუსული გამოცემები.
თვითმხილველთა თქმით, გასროლამდე მათ დაინახეს ახალგაზრდა ადამიანი, რომელიც დიდხანს საუბრობდა მობილურ ტელეფონზე, გასროლის შემდეგ კი სასწრაფოდ ადგილიდან მიიმალა. ვარაუდობენ, რომ სწორედ ის უწევდა კოორდინაციას მკვლელობას.
სამართალდამცველებმა უკვე აღნიშნული მოტოციკლიც იპოვეს, რომელიც კრილატსკაიას და ოსტროვნაიას ქუჩების კვეთაზე იყო მიტოვებული.
მოგვიანებით კი გაირკვა, რომ მოკლული, 1956 წელს დაბადებული, ყოფილი გენერალი რომან დუმბაძეა, რომელიც აჭარის ავტონომიური რესპუბლიკის ლიდერის ასლან აბაშიძის პერიოდში საქართველოს თავდაცვის სამინისტროს 25-ე ბრიგადას მეთაურობდა.
ვარდების რევოლუციის შემდეგ აჭარაში განვითარებული მოვლენების დროს რომან დუმბაძემ უარი თქვა დამორჩილებოდა საქართველოს შეიარარებული ძალების მთავარსარდლის ბრძანებებს და განაცხადა, რომ ის მხოლოდ ასლან აბაშიძის ბრძანებებს შეასრულებდა. დუმბაძე 2006 წელს სამშობლოს ღალატის ბრალდებით დააკავეს. 2008 წელს, ომის შემდეგ, რუსეთმა, რომან დუმბაძის აგვისტოს ომის დროს დატყვევებულ ქართველ სამხედროებზე გაცვლა ითხოვა. დუმბაძე იმდენად ძვირფასი აღმოჩნდა მოსკოვისათვის, რომ ის, ენგურის ხიდიდან, სადაც გაცვლა შედგა, პირადად რუსმა გენერალმა ბორისოვმა წაიყვანა.
2010 წელს რომან დუმბაძეს რუსეთის პრეზიდენტმა რუსეთის მოქალაქეობა მისცა.
უნდა აღინიშნოს, რომ ეს ასლან აბაშიძის გარემოცვის წევრის მკვლელობის პირველი შემთხვევა არ არის. 2010 წელს მოსკოვში ასევე მოკლეს აჭარის ავტონომიური რესპუბლიკის შს მინისტრის ყოფილი მოადგილე ელგუჯა ჯინჭარაძე, მეტსახელად „რემბო“.