21:15:00 24-04-2012
ციხე, სადაც, ბრეივიკს ჩასვამენ (ფოტოები)
ადგილი, სადაც 77 ადამიანის მკვლელ ნორვეგიელ ანდრეს ბრეივიკს მოათავსებენ (თუკი ფსიქიატრიულ კლინიკაში მკურნალობა არ მიუსაჯეს), ნებისმიერს შოკში ჩააგდებს.
ეს ციხე საუკეთესო სასტუმროს ჩამოჰგავს და არა მკაცრი რეჟიმის დაწესებულებას. ნორვეგიული ციხე Halden, სადაც განსაკუთრებით საშიში დამნაშავეები _ მკვლელები, მანიაკები, მოძალადეები და ნარკომოვაჭრეები იმყოფებიან, ნორვეგიაში ყველაზე კომფორტულია. მისი აგება, როგორც მსოფლიოში ყველაზე ჰუმანური ციხისა, მეფე ჰაროლდ მეხუთემ ჩაიფიქრა და იგი გასულ წელს გაიხსნა. თითოეულ პატიმარს აქ თავისი ცალკე საკანი, უფრო სწორად, ოთახი აქვს, სრულიად კეთილმოწყობილი. ოთახებში დგას ტელევიზორები და მინი-მაცივრები. პატიმარს შეუძლია ჰქონდეს თავისი საკუთარი ტანსაცმელი, წიგნები, წერისა და ხატვისთვის საჭირო ნივთები, ელექტროსაპარსი, ასევე, ლიცენზირებული მუსიკალური დისკები და CD-პლეერები. ზოგიერთს კარგი ყოფაქცევისთვის ინტერნეტში შესვლის უფლებასაც აძლევენ.
აქ არის, აგრეთვე, „საოჯახო სახლი“, სადაც მისჯილებს ოჯახის წევრებთან ერთად ცხოვრება შეუძლიათ. ბავშვებისთვის მოწყობილია ცალკე საძინებლები და საბავშვო მოედნები.
ციხის პერსონალის უმრავლესობას ქალები შეადგენენ. ხელმძღვანელობის აზრით, ეს პატიმრებში აგრესიას ასუსტებს. დამნაშავეები და ზედამხედველები ერთად სადილობენ და თამაშობენ სპორტის სხვადასხვა სახეებში. ყოველ მისჯილს შეუძლია ეწვიოს სპეციალურ ბლოკს და სასურველი საქმით დაკავდეს - მაგალითად, დაესწროს კულინარიულ გაკვეთილებს ან იმეცადინოს მუსიკალურ სტუდიაში.
„მე არ მეშინია იმ პერსპექტივისა, რომ მთელი ცხოვრება ციხეში უნდა გავატარო, - თქვა სასამართლოზე ბრეივიკმა, რომელსაც 21-წლიანი პატიმრობა მიუსაჯეს, და დასძინა, რომ მხედველობაში თავისი მშობლიური ნორვეგია ჰქონდა: - მე ციხეში დავიბადე, სადაც არ შემიძლია თავისუფლად გამოვხატო ჩემი მსოფლმხედველობა... თავდასხმა პრევენციული ხასიათის იყო, ამიტომ არ ვცნობ თავს სისხლის სამართლის დამნაშავედ. მე უნდა გამანთავისუფლონ!“
მას მიაჩნია, რომ სწორად მოიქცა და კვლავაც იგივეს ჩაიდენდა, თავისუფალი რომ იყოს.
0