15:52:30 23-04-2012
რუსი ბიზნესმენის ცემა-ტყეპა აფხაზურად (ვიდეო)
ინტერნეტში გავრცელდა ვიდეო, რომელიც აფხაზეთში სკანდალურად ცნობილი რუსი ბიზნესმენის ცემის სცენას ასახავს. იგორ ვაროვი დაახლოებით, ათიოდე დღის წინ საავადმყოფოში მოხვდა, იმის გამო, რომ ის, საკუთარ კაბინეტში, აფხაზმა მეწილეებმა ბოთლებით სცემეს. როგორც მაშინ პრესა.ჯი წერდა ვაროვისთვის, გაგრაში მოარული ხმების თანახმად, ბიზნესის წართმევა სურთ.
საუბარია გაგრაში არსებულ საინვესტიციო პროექტ სუპერმარკეტ „კონტინენტალზე“, რომელიც ვაროვის ბიზნესია. მან, როგორც ამბობენ, გაგრელებს სამუშაო ადგილები შეუქმნა, თუმცა ვაროვი თვალში არ მოსდით. მას ხან სამართალდამცავები დევნიან გადასახადების გადაუხდელობის პრეტენზიით, ხან კი თანამადამფუძნებელი აფხაზები ურტყამენ. არადა, თავად სოხუმშიც აღიარებენ, რომ ვაროვი, ფაქტობრივად, ერთადერთი რუსი ბიზნესმენია, რომელმაც აფხაზეთში სერიოზული ინვესტიცია ჩადო, თუმცა მას ბიზნესის წართმევას უპირებენ.
ვაროვთან ერთად, „კონტინენტალის“ დამფუძნებლებს შორის არის ადგილობრივი ბიზნესმენი ასტამურ გაგულია, რომლის მამაც, გენადი გაგულია აფხაზეთის სავაჭრო-სამრეწველო პალატის პრეზიდენტია. ვაროვი ამბობს, რომ დამფუძნებლები მას კაბინეტში შეუცვივდნენ და ღვინის ბოთლები ურტყეს თავში, რადგან ბიზნესის წართმევა სურთ.
ინტერნეტში გავრცელებული ვიდეო აფხაზურ ფორუმებზე განხილვის აქტიური საგანი გახდა, საიდანაც ისიც ირკვევა, რა პრეტენზიები ჰქონიათ აფხაზებს რუს ბიზნესმენთან. მაგალითად, ერთ-ერთი კომენტარი ასეთია:
„აფხაზეთში მუშაობისთვის არის მხოლოდ ერთი კანონიერი კრიტერიუმი - აფხაზეთის რესპუბლიკის კანონების შესრულება. არც მაღალი ფასები, არც ღვინის ბოთლები წარწერებით „ჯორჯია“, არც მაღაზიის პატრონის მორალურ-ეთიკური მონაცემები და მისი რთულად შეწყობა აფხაზებთან, არ უნდა გახდეს მაღაზიის დახურვის მიზეზი“.
„ყიდულობს რა ღვინოს მოლდოვაში, „კონტინენტი“ ეხმარება განვითარებას მოლდოველებისას, რომლებიც მხარს უჭერენ საქართველოს“. ფორუმელები სვამენ კითხვებს - რატომ იყიდებოდა ვაროვის მაღაზიაში ყველი „თბილისური“ და ა. შ.
თუმცა ეს ის საკითხებია, რაზეც რიგითი ადამიანები ამახვილებენ ყურადღებას. რეალურად კი, ვაროვის აფხაზი „ბიზნეს-პარტნიორები“, ჩვეულებრივი, აფხაზური კლანური სისტემის ტიპიური წარმომადგენლები არიან, რომლებსაც თავისი დაუწერელი კანონები აქვთ და სასჯელიც, ამ კანონების შეუსრულებლობისთვის შესაბამისია - ბოთლი თავში.
0