ღვეზელი ადამიანის ხორცით - ბრაზილიაში ქუჩის მოვაჭრე კანიბალები დაიჭირეს

ბრაზილიის შტატ პერნამბუკსის ქალაქ გარანიუსში, მოსახლეობა კარგა ხანია, რაც დიდი სიამოვნებით ყიდულობდა და მიირთმევდა ღვეზელებს, რომელსაც ქუჩის მოვაჭრე იზაბელ სილვა აცხობდა.

ათიოდე დღის წინ, ღვეზელის მოყვარულებს სილვა ადგილზე აღარ დახვდათ, ცოტა ხანში კი შეიტყვეს, რომ ის სწორედ იმ გემრიელი ღვეზელების გამო დააკავეს. თუმცა არა იმიტომ, რომ უკანონოდ ვაჭრობდა ქუჩაში. მოსახლეობა შოკშია მას შემდეგ, რაც შეტყვეს, რომ მთელი ამ ხნის განმავლობაში ადამიანის ხორცით შეზავებულ ღვეზელებს ჭამდნენ…

51 წლის სილვა თავის ქმართან - ჟორჟ ნეგრომონტე სილვეირასთან და ქმრის საყვარელთან - ბრუნა კრისტინა ოლივეირასთან ერთად დააკავეს. ისინი მკვლელობებსა და კანიბალიზმში არიან ეჭვმიტანილები. გამოძიების ვერსიით, ეს სამი ადამიანი კლავდა ადამიანებს, მათ ხორცს, ნაწილს თავად მიირთმევდნენ, ნაწილით კი ღვეზელებისთვის შიგთავსს ამზადებდნენ, თანაც ტრადიციული ბრაზილიური ღვეზელების „ემპადასის“ რეცეპტის მიხედვით, რომელიც ბრაზილიაში ძალიან უყვართ. დაკავებულებმა წაყენებული ბრალდებები უკვე აღიარეს.

უკვე გაირკვა ისიც, რომ სამივე კანიბალი სექტა „კარტელი“-ს წევრია. აღნიშნული სექტა, ბრაზილიელი სამართალდამცველების ინფორმაციით „მსოფლიოს გაწმენდისა და მოსახლეობის შემცირებისთვის“ „იღწვის“. სან-პაულუში გამომავალი გაზეთი Folha წერს, რომ სექტანტებმა მიზნად დაისახეს დედამიწის მოსახლეობის ზრდის ტენდენციის შეჩერება, ხოლო ამის მისაღწევად, სექტის ყოველმა წევრმა, მინიმუმ, ორი ადამიანი მაინც უნდა მოკლას. გამოცემა, ასევე, წერს, რომ ჟორჟ ნეგრომონტე სილვეირა არის 50-გვერდიანი ტრაქტატის „შოზიფრენიკის ჩანაწერების“ ავტორი. თავის „ნაშრომში“ ის ყვება, რომ სულით ავადმყოფია და ესმის ხმები, რომელიც მას ქალების მკვლელობებისკენ მოუწოდებს.

პოლიციამ კანიბალების დაკავებისას მათი საცხოვრებელი გაჩრიკა. სახლის უკანა ეზოში ფაქტებიც იპოვეს: ორი ქალის გვამი. ესენი არიან 20 წლის ალექსანდრა ფალკაო და 31 წლის ჟიზელ ელენა და სილვა, რომლებზეც მთელი ამ ხნის განმავლობაში ძებნა იყო გამოცხადებული.

სექტანტებს მსხვერპლი მიტყუების ასეთი სქემა ჰქონდათ: ისინი ქალებს ოჯახში სამუშაოდ იწვევდნენ, შემდეგ კი კლავდნენ. პოლიცია ასევე ვარაუდობს, რომ სწორედ მათ მიერაა მოკლული ერთ-ერთი უსახლკარო ქალბატონი, რომელსაც სამართალდამცველები 2008 წლიდან ეძებენ. გაუჩინარებული ქალი სწორედ სექტანტების ოჯახში მუშაობდა. კანიბალებთან ამ დრომდე ცხოვრობდა მისი 5 წლის გოგონაც, რომელსაც იზაბელ სილვა საკუთარ შვილად ასაღებდა.

ეჭვობენ, რომ სამეული მორიგი მკვლელობის მზადების პროცესში იყო. მსხვერპლი 18 წლის გოგონა უნდა გამხდარიყო. ამის შესახებ თავად კანიბალების სახლში ჩხრეკისას ნაპოვნ რვეულში ამოიკითხეს. როგორც ირკვევა, ბრუნა კრისტინა ოლივეირა ჩანაწერებს აწარმოებდა, სადაც ღვეზელების დამზადების პროცესს - ხორცის მოპოვებიდან მის რეალიზაციამდე, ზოგიერთ შემთხვევებში, დეტალურადაც აღწერდა.

დაკითხვაზე ცოლს, ქმარსა და ქმრის საყვარელს ოდნავი სინანულიც კი არ გამოუთქვამთ ჩადენილ მკვლელობებთან დაკავშირებით. იზაბელ სილვამ გამომძიებელს ისიც უთხრა, რომ „შესაძლოა, თქვენც მოგყიდეთ ღვეზელი“. ის სასწაულს ვერაფერს ხედავს ამაში, რადგან ამტკიცებს, რომ ადამიანის ხორცს „ძალიან ცოტა რაოდენობით“ იყენებდა.

ამ ამბის გახმაურების შემდეგ, სექტანტების სახლი განრისხებულმა მეზობლებმა ფერფლად აქციეს. სამწუხაროდ, ამის გამო კანიბალების დანაშაულის დამადასტურებელი ბევრი მტკიცებულებაც განადგურდა.

0

ავტორი: