კადიროვის მრჩეველი და მცველები, ქართველის გატაცებისა და გამოძალვის ბრალდებით დააკავეს

მოსკოვში,  რამზან კადიროვის თანაშემწე და უსაფრთხოების სამსახურის წარმომადგენლები ადამიანის გატაცებისა და გამოძალვის ბრალდებით დააკავეს. როგორც გაირკვა, ჩეჩნეთის პრეზიდენტის „თანამშრომლებმა“ საქართველოს მოქალაქე გაიტაცეს და მისგან ავტომანქანის გამოძალვას  ცდილობდნენ.

მოსკოვის საქალაქო სასამართლომ პატიმრობაში დატოვა ჩეჩნეთის შსს-ს ორი თანამშრომელი მუსხაჯ მუსულაევი და ძამბოლატ მუხმატმურზიევი, რომლებიც რამზან კადიროვის პირადი უსაფრთხოების უზრუნველყოფით არიან დაკავებულები. მათთან ერთად დააკავეს ჩეჩნეთის პრეზიდენტის მრჩეველი უშიშროების საკითხებში, ზელიმხან ისრაილოვი, თუმცა ის მოგვიანებით გაათავისუფლეს - იუწყება „როსბალტი“.

გამოცემა რუსეთის სპეცსამსახურებზე დაყრდნობით წერს, რომ ჩეჩენი ძალოვნების დაკავების ოპერაცია ვლადიმერ პუტინის არჩევნებამდე 2 დღით ადრე ჩატარდა, რესტორან „წელიწადის დროებში“, სადაც სპეცრაზმი შეიჭრა და 15 ადამიანი - ჩეჩნები და ყაბარდო-ბალყარელები დააკავა. პრეზიდენტის არჩევნების შემდეგ დაკავებულთა ნაწილი გაუშვეს. დატოვეს მხოლოდ 7 ადამიანი, მათ შორის კადიროვის „უსაფრთხოების მცველები“, რომლებსაც ადამიანის გატაცებისა და გამოძალვის ბრალდებით აგებინებენ პასუხს.

არაოფიციალური ვერსიით, 2011 წელს ჩეჩენ ძალოვნებს მოსკოვში ყოფნისას ავტომანქანა Lexis lx 570 გასტაცეს. მათ პოლიციაში არ განუცხადებიათ და თავად დაიწყეს გამოძიება. მიაკვლიეს საქართველოს მოქალაქეს (რომლის ვინაობაც არ სახელდება), რომელიც მანქანის გატაცების გამო რამდენჯერმეა ნასამართლევი და ეს ადამიანი თავად გაიტაცეს. ქართველი მოსკოვის გარეუბანში კერძო სახლში მიიყვანეს, სადაც რამდენიმე დღის განმავლობაში მას 12 კაცი ურტყამდა. მას შემდეგ, რაც მძევალი დაითანხმეს, რომ მანქანას დააბრუნებდა, ის ტრასაზე დააგდეს.

გამოძიების ვერსია ცოტა განსხვავებულია. ამ ვერსიის თანახმად, საქართველოს მოქალაქე თავის მეგობარს Lexis lx 570-ის გაყიდვაში ეხმარებოდა და როცა ჩეჩნების სახით პოტენციური მყიდველი შეითანხმა, მივიდა კიდეც შეხვედრის ადგილზე, თუმცა უმანქანოდ. მიუხედავად ამისა, ჩეჩნებმა ის მაინც გაიტაცეს და ავტომანქანის გამოძალვის მოთხოვნით რამდენიმე დღის განმავლობაში საშინლად ძალადობდნენ მასზე, რის შემდეგაც ქართველი დაითანხმეს და ტრასაზე დააგდეს. მძევალი მრავალჯერადი მოტეხილობებითა და ტრავმებით საავადმყოფოში მოხვდა, სადაც რამდენიმე თვის განმავლობაში მკურნალობდა. მომხდარის პოლიციაში გაცხადება კი მხოლოდ 2012 წლის დასაწყისში გაბედა.

მოკოვის სამართალდამცველ ორგამოებში აცხადებენ, რომ რამზან კადიროვის ძალოვნები კრიმინალურ ქრონიკაში პირველად არ მოხვედრილან. მაგალითად, 2009 წელს, ერთ-ერთმა მათგანმა ,მოსკოვში ტროლეიბუსს გზა გადაუკეტა და ცეცხლი გაუხსნა, 2008 წელს კი კადიროვის მრჩევლებსა და მცველებს ისევ მოსკოვში, კაფეში აზერბაიჯანელებთან მოუხდათ ჩხუბი, რა დროსაც ასევე თვითშემოქმედებით შეეცადნენ წესრიგის დამყარებას და შედეგად, კინაღამ რიგითი გამვლელი მოკლეს.

0

ავტორი: