რუსმა პოლიციელებმა მოწმეს ჯერ „მამაო ჩვენო“ წააკითხეს, შემდეგ ბოთლით გააუპატიურეს (ვიდეო)

მას შემდეგ, რაც ყაზანის პოლიციის „დალნის“ განყოფილებაში ნაწამებმა სერგეი ნაზაროვმა სიკვდილის წინ განაცხადა, რომ ის პოლიციელებმა შამპანურის ბოთლით გააუპატირეს, მსგავს ფაქტებზე საჯაროდ საუბრის სურვილი პოლიციის ძალადობას დაქვემდებარებულ სხვა ადამიანებსაც გაუჩნდათ.

ბოლოს, ინტერნეტში გავრცელდა ყუბანის მკვიდრის სერგეი მედვეშის ვიდეო, რომელიც ჰყვება, რომ პოლიციელებმა ისიც ანალოგიური მეთოდით, ამჯერად, არყის ბოთლით გააუპატიურეს.
მედვეშის თქმით, სამართალდამცავები ამ ფორმით, მისგან, როგორც მკვლელობის მოწმისგან, სასურველი ჩვენების მიღებას ცდილობდნენ.

აღნიშნული ფაქტი კრასნოდარის მხარის ქალაქ კრიმსკის სისხლის სამართლის სამძებროს განყოფილების უფროსის კაბინეტში მოხდა. პოლიციის მსხვერპლი ყვება, რომ ის აიძულეს, ჯერ „მამაო ჩვენო“ წაეკითხა, რამდენადაც ოთახის კედელზე ხატი ეკიდა,  შემდეგ კი გახადეს საცვლები და ბოთლით გაუპატიურება დაუწყეს.

ამის შემდეგ მან სიტყვა-სიტყვით გაიმეორა ჩვენება, რომლის მოსმენაც პოლიციას სურდა. „ჩემთან მოვიდა სამძებროს განყოფილების უფროსი, რომელსაც ალკოჰოლის სუნი ასდიოდა და მეუბნება:  წაიკითხე „მამაო ჩვენო“. იქ, ოთახში ხატი ეკიდათ. მე არ ვიცოდი ტექსტი და ჩემს თავზე დავიწყე ლაპარაკი. მაშინ მითხრეს: დაჯექი სკამზე. მე დავჯექი და…“ - ყვება ის თავის ვიდეომიმართვაში.

ეს ამბავი ერთი წლის წინ მოხდა. სერგეი მედვეში მის გახმაურებას არ აპირებდა, რადგან შიშობდა, რომ ამის შემდეგ ცოცხალს არ დატოვებდნენ. თუმცა, მას შემდეგ, რაც ყაზანის პოლიციაში მომხდარი ფაქტი გახმაურდა, გადაწყვიტა თავისი ამბავი ინტერნეტით გაევრცელებინა, თუმცა ახლაც ამბობს, რომ ეშინია: „ან ნარკოტიკებს ჩამიდებენ, ან სახლამდე ცოცხალი ვერ მივალ. მე ჩემი ოჯახის გამო მეშინია“ - ამბობს ის.

მედვეშის ისტორია სამართალდამცავებისთვისაც ინტერნეტის საშუალებით გახდა ცნობილი. ვიდეოს ნახვის შემდეგ, შესაბამისმა უწყებებმა მედვეშის მიერ მოყოლილი ძალადობის ფაქტების გადამოწმება დაიწყეს. შედეგებზე შემოწმების შემდეგ ვისაუბრებთ - ამბობენ რუსეთის საგამოძიებო კომიტეტში.

ამასობაში კი, რუსეთის შს მინისტრი რაშიდ ნურგალიევი გამოსავლის ძიების პროცესშია. პოლიციაში წამების ფაქტები უკვე ძალიან ბევრი დაგროვდა. ჯერჯერობით, იმაზე უკეთესი, რომ პოლიციელთა სასწავლებლებში „კაცთმოყვარეობის“ კურსი შემოიღონ, მინისტრმა ვერაფერი მოიფიქრა.

იხილეთ ვიდეო http://publicpost.ru/blog/id/7835/

0

ავტორი: