იდუმალებით მოცული ისტორია, რომლის კვალიც ვატიკანში მიდის

რომის პროკურატურამ 29 წლის წინანდელი საქმის გამოძიება უკვე მეორედ განაახლა, რომელშიც მთავარი ეჭვმიტანილი ვატიკანია, - წერს The Daily Telegraph.

საქმე ეხება ვატიკანის ერთ-ერთი მსახურის ქალიშვილის, 15 წლის ემანუელა ორლანდის გაუჩინარებას. რომის პროკურორების აზრით, ვატიკანში, მათ შორის პაპის კურიაში (კათოლიკური ეკლესიის ცენტრალური აღმასრულებელი, სასამართლო და საკანონმდებლო ორგანოების ერთობლიობა), არიან ადამიანები, რომლებმაც იციან, თუ რა ბედი ეწია ორლანდის, თუმცა ამის აღიარება არ სურთ და წლებია, დუმილს ინარჩუნებენ.

ემანუელა ორლანდი 1983 წელს გაიტაცეს. ითვლება, რომ ის მოკლეს, თუმცა მისი ცხედარი არავის უნახავს. ერთ-ერთი ვერსიით, გოგონა მოკლეს იმიტომ, რომ ამით გააფრთხილეს მამა, რომელმაც შვილის გატაცებამდე ცოტა ხნით ადრე აღმოაჩინა დოკუმენტური მტკიცებულება იმისა, რომ ვატიკანის ბანკი დანაშაულებრივ ორგანიზაციებთან იყო კავშირში. ვარაუდობენ, რომ ორლანდის მკვლელობა შეუკვეთეს სწორედ იმიტომ, რომ მამამისი, იძულებული ყოფილიყო, გაჩუმებულიყო.
გატაცებასა და მკვლელობაზე პასუხისმგებლობა რომის დანაშაულებრივი დაჯგუფების, „მალიანას“ მეთაურს, ენრიკო დე პედისას დაეკისრა. ის მოწინააღმდეგე დაჯგუფებამ 1990 წელს მოკლა.

2008 წელს, ორლანდის გატაცების საქმე ისევ განახლდა. სწორედ მაშინ იქცა ის კიდევ უფრო ხმაურიან საქმედ, რადგანაც გოგონას გატაცებაში ეჭვმიტანილად ვატიკანის ბანკის ყოფილი ხელმძღვანელი, არქიეპისკოპოსი პოლ კაზიმირ მარცინკუსი სცნეს, თუმცა მარცინკუსი იმ დროისთვის უკვე ცოცხალი აღარ იყო.

მოვლენები მართლაც რომ მძაფრსიუჟეტიანი დეტექტივის მსგავსად განვითარდა. როგორც უცხოური მედია წერდა, 2008 წელს პოლიციას ახალმა მოწმემ მიაკითხა, - საბრინა მინარდი რომის მაფიური დაჯგუფების ხელმძღვანელის, ზემოთხსენებული ენრიკო დე პედისის მეგობარი გოგონა იყო. მან განაცხადა, რომ ორლანდი დე პედისმა გაიტაცა, ხოლო გატაცების შემკვეთად მან არქიეპისკოპოსი პოლ კაზიმირ მარცინკუსი დაასახელა.

მოწმემ დაადასტურა, რომ ვატიკანის ბანკის,- „რელიგიური საქმეების ინსტიტუტის“ საშუალებით, რომელსაც 1971-1989 წლებში მარცინკუსი ხელმძღვანელობდა, აქტიურად  თეთრდებოდა მაფიოზური ფული. საბრინა მინარდიმ ისიც დაადასტურა, რომ დე პედისს არცთუ იშვიათად დაჰქონდა სასულიერო პირებთან ფულით სავსე „ლუის ვიტონის“ სამგზავრო ჩანთა.

ვატიკანის ბანკი სკანდალში გაეხვა1982 წელსაც, როცა პოლიციამ დაიწყო საეჭვო ვითარებაში გაბანკროტებული ბანკ „ამბროზიანოს“ საქმის შესწავლა. სწორედ მისი აქციონერი და შესაბამისად მის ვალებზე პასუხისმგებელი იყო ვატიკანის ბანკი. „ამბროზიანოს“ დირექტორი მოკლეს, გამოძიებამ კი განაცხადა, რომ მკვლელობის უკან მაფია იდგა, რომელიც როგორც აღმოჩნდა, „ამბროზიანოს“ საშუალებით წლების მანძილზე ათეთრებდა ფულს. ერთ-ერთი ვერსიით, მაფიამ 450 მილიონი დოლარის, როგორც კომპენსაციის გადახდა, ამ პარტნიორული ურთიერთობების გამო სწორედ ვატიკანის ბანკისგან მოითხოვა. ამავე ვერსიით, სწორედ ამ დროს
შეიმუშავა მარცინკუსმა  ორლანდის გატაცების სქემაც, რათა ამით მილიონები გაეკეთებინა.

სქემას შემდეგნაირად უნდა ემუშავა: მარცინკუსი კონტაქტში შევიდა რადიკალ ისლამისტურ დაჯგუფებებთან და დაპირდა მათ, რომ დაეხმარებოდა პაპზე - იოანე პავლე მეორეზე თავდამსხმელი ტერორისტის - ალი აგჯას გათავისუფლების საქმეში. პარალელურად, ის ანონიმურად რეკავდა ვატიკანში და ემანუელა ორლანდის აგჯაზე გაცვლას სთავაზობდა. ჩანაფიქრის მიხედვით, აგჯა უნდა გამოეშვათ, გოგონა გაეთავისუფლებინათ, ისლამისტებისგან მიღებულ მილიონებს კი მარცინკუსი მაფიას გადაუხდიდა…

მაგრამ ტერორისტი ციხიდან ვერ გაათავისუფლეს, გოგონას ცხედარი კი ცემენტში ჩაუშვეს.

მოწმე საბრინა მინარდიმ მოყვა, რომ როგორღაც, დე პედისთან ერთად ზღვისპირა ქალაქ ტორვაიანიკაში გაემგზავრა. დე პედისს საბარგულში 2 დიდი ტომარა ედო, რომლებიც მათ მეგობრის მშენებლობაზე დატოვეს. როცა რომში დაბრუნდნენ, დე პედისმა კოკაინის დოზა მიიღო და მეგობარ ქალთან ყველაფერი დაფქვა: ტომრებში, რომლებიც ცემენტში ჩაუშვეს, მაფიის მიერ მოტაცებული ბავშვების, მათ შორის ემანუელას ცხედარიც იყო…

ორლანდის გატაცებასთან ვატიკანის კავშირის შესახებ ეჭვი საზოგადოებას კიდევ იმიტომ გაუჩნდა, რომ სავარაუდო მკვლელს - დე პედისს, დიდი პატივი ერგო წილად, - ის დაკრძალეს იქ, სადაც ჩვეულებრივ, ეკლესიის მსახურებს კრძალავენ ხოლმე - სანტ-აპოლინარის ბაზილიკის საძვალეში.

და კიდევ ერთი უცნაური დეტალი ამ იდუმალებით მოცული საქმისა. ერთ-ერთი ვერსიით, ემანუელა ორლანდის ნეშტის ნაწილები სწორედ ზემოხსენებულ საძვალეში დე პედისთან ერთადაა დაკრძალული. მოკლული გოგონას ძმამ ამ დღეებში განაცხადა, რომ საჭიროდ თვლის საფლავის გახსნას, რათა დაადგინოს, მართლაც დაკრძალულია თუ არა იქ მისი დის ნეშტის ნაწილები.

0

ავტორი: