სოფო ნიკოლაშვილი სასამართლო დარბაზიდან გაათავისუფლეს

განზრახ მკვლელობისა და უკანონოდ იარაღის ტარების ბრალდებით დაკავებული ჟურნალისტი, 20 წლის სოფო ნიკოლაშვილი სასამართლო დარბაზიდან გაათავისუფლეს. მოსამართლემ ამის შესახებ გადაწყვეტილება რამდენიმე წუთის წინ მიიღო.

სოფო ნიკოლაშვილი 5 ათასი ლარის გირაოს საფუძველზე  გაათავისუფლეს. მოსამართლემ საპროცესო კოდექსის მე-9 და 182 მუხლის მიხედვით, მოთხოვნა დააკმაყოფილა.

ნიკოლაშვილის სასამართლო პროცესი დღეს 13 საათზე დაიწყო. სასამართლო სხდომის დასაწყისშივე, ნიკოლაშვილმა მოითხოვა სხდომა სახურული ყოფილიყო. ამის მიზეზად ბრალდებულმა საქმეში არსებული მისი პირადი ცხოვრების ინტიმური დეტალები დაასახელა.

მოსამართლე ვახტანგ მრევლაშვილმა  ნიკოლაშვილის ამ დასაბუთების შემდეგ ბრალდებულის მოთხოვნა დააკმაყოფილა.

შეგახსენებთ, რომ გაზეთ „კახეთის ხმის“ ყოფილი  ჟურნალისტი სოფო ნიკოლაშვილი 31 იანვარს დააკავეს.  იგი ბრალდებული იყო 23 წლის გიორგი სიბაშვილის განზრახ მკვლელობის მცდელობისთვის.  სიბაშვილსა და ნიკოლაშვილს პირადი ურთიერთობა ჰქონდათ. გავრცელებული ინფორმაციით, ჟურნალისტს სიბაშვილი უყვარდა.

გიორგი სიბაშვილი,  შს სამინისტროს  კახეთის მთავარი სამმართველოს თანამშრომელია, მისი მამა, გოჩა სიბაშვილი კი გურჯაანის პოლიციის უფროსის მოადგილე, ბიძა გიორგი სიბაშვილი კი კახეთის ვიცე-გუბერნატორია.

0

ავტორი: