13:39:30 28-03-2012
22 წლის გიორგი კენჭაძის მკვლელობის საქმე, სააპელაციო სასამართლოში ინაცვლებს
დღეს, თბილისის სააპელაციო სასამართლო განიხილავს სისხლის სამართლის საქმეს, რომელიც ახალგაზრდებს შორის მომხდარ ,,ქუჩური გარჩევის” საზარელ შემთხვევას ეხება.
22 წლის გიორგი კენჭაძის მკვლელობის საქმემ, რომელიც თბილისში, კანცელარიის მიმდებარე ტერიტორიაზე, 2010 წლის 30 დეკემბერს მოხდა, სააპელაციო სასამართლოში გადაინაცვლა.
პირველი ინსტანციის სასამართლომ დაუსწრებლად გამოუტანა განაჩენი კენჭაძის მკვლელობაში ბრალდებულ თორნიკე გიგოლაშვილს, რადგან მან დანაშაულის ჩადენის შემდეგ მიმალვა მოახერხა.
თბილისის საქალაქო სასამართლოს ინფორმაციით, ,,საქმის მასალების მიხედვით, 2010 წლის ნოემბერში, გიგოლაშვილმა ტელეფონის საშუალებით სიტყვიერი შეურაცხყოფა მიაყენა გიორგი კენჭაძის მეგობარ გოგონას, რამაც მათ შორის ურთიერთობის დაძაბვა გამოიწვია. აღნიშნულ ინციდენტს მოჰყვა ე.წ. ,,ქუჩური გარჩევები”, რა დროსაც ახალგაზრდები სასტიკად გაუსწორდნენ ერთმანეთს. გიორგი კენჭაძის მიმართ შურისძიებით განმსჭვალულმა გიგოლაშვილმა, გამოძიებისთვის დაუდგენელ დროსა და ვითარებაში, უკანონოდ შეიძინა გადაჭრილი სანადირო თოფი ე.წ. ,,აბრეზი”, რომელსაც უკანონოდ ინახავდა და ატარებდა. ის ელოდებოდა შესაბამის მომენტს, როდესაც საშუალება მიეცემოდა და გიორგი კენჭაძეს სიცოცხლის მოსპობით გაუსწორდებოდა.
2010 წლის 30 დეკემბერს, გიგოლაშვილმა შეიტყო, რომ გიორგი კენჭაძე მეგობრებთან ერთად, სახელმწიფო კანცელარიის მიმდებარე ტერიტორიაზე იმყოფებოდა, სადაც ისინი ალკოჰოლურ სასმელს იღებდნენ. ხსენებულ ადგილზე გიგოლაშვილი არასრულწლოვან მეგობართან ერთად მივიდა და ისე, რომ მათ შორის არანაირი საუბარი არ შემდგარა, თანნაქონი ცეცხლსასროლი იარაღი გიორგი კენჭაძეს დაუმიზნა და მისი მიმართულებით ერთი გასროლა განახორციელა. გიორგი კენჭაძე მიყენებული დაზიანების შედეგად, ადგილზე გარდაიცვალა.
მიუხედავად იმისა, რომ არასრულწლოვანმა ბრალდებულმა იცოდა განსაკუთრებით მძიმე დანაშაულის ჩადენის ფაქტი და ასევე მისთვის ცნობილი იყო, რომ გიორგი კენჭაძის მკვლელობა ჩაიდინა გიგოლაშვილმა, შეგნებულად არ განაცხადა სამართალდამცავ ორგანოებში და არც არაფერი იმოქმედა აღნიშნული დანაშაულის ჩამდენი პირის მხილების მიზნით, რითაც ხელი შეუშალა საქმეზე ჭეშმარიტების დადგენას.
სასამართლო განხილვისას, არასრულწლოვანმა ბრალდებულმა სრულად აღიარა ჩადენილი დანაშაული. გარდა მისი აღიარებითი ჩვენებისა, გიგოლაშვილის ბრალეულობა დადასტურებულ იქნა დახურულ სასამართლო სხდომაზე გამოკვლეული შემდეგი მტკიცებულებებით, კერძოდ: თვითმხილველ მოწმეთა ჩვენებებით, ჩატარებული საგამოძიებო ექსპერიმენტის და ფოტოსურათებით ამოცნობის ოქმებით, სასამართლო-სამედიცინო ექსპერტიზის დასკვნით და საქმეში არსებული სხვა უტყუარი მტკიცებულებებით.
არასრულწლოვან ბრალდებულთან დამტკიცდა საპროცესო შეთანხმება და მას განსაკუთრებით მძიმე დანაშაულის შეუტყობინებლობისათვის სასჯელის სახედ და ზომად 3 (სამი) წლით თავისუფლების აღკეთა განესაზღვრა, საიდანაც 1 (ერთ) წელს მოიხდის სასჯელაღსრულებით დაწსებულებაში, ხოლო 2 (ორი) წელი ჩაეთვალა პირობით 3 (სამი) წლის გამოსაცდელი ვადით.
რაც შეეხება ძებნაში მყოფ გიგოლაშვილს, მას სასამართლომ, განზრახ მკვლელობისა და ცეცხლსასროლი იარაღის და საბრძოლო მასალის მართლსაწინააღმდეგო შეძენა, შენახვა და ტარებისათვის სასჯელის სახედ და ზომად 21 წლით თავისუფლების აღკვეთა შეუფარდა.
მკვლელობას, რომელიც ქალაქის ერთ-ერთ ცენტრალურ ქუჩაზე მოხდა, უამრავი თვითმხილველი ჰყავდა. გამოძიების მასალებით დადგენილია, რომ ამ შემზარავ შემთხვევას მცირეწლოვანი ბავშვიც შეესწრო. ასევე საუბარი იყო, რომ გიორგი კენჭაძის მკვლელობა, მიმდებარე ტერიტორიაზე არსებულმა სათვალთვალო კამერებმაც დააფიქსირეს.
0