ვლადივოსტოკის ბაზარში ადამიანის ხორცით ვაჭრობდნენ - რუსეთში კანიბალს კანიბალზე იჭერენ

ვლადივოსტოკში, კუნძულ რუსსკიზე, პოლიციელებმა, კანიბალიზმში ეჭვმიტანილი ორი მამაკაცი დაიჭირეს, რომლებმაც აღიარეს, რომ რამდენიმე დღის განმავლობაში მეგობრის ხორცით იკვებებოდნენ.

თუმცა, როგორც გაირკვა, კაციჭამიებს ადამიანის ხორცი ბაზარში გასაყიდადაც გაუტანიათ. სწორედ ამის შემდეგ მიაგნო მათ კვალს პოლიციამ, რომელსაც ერთ-ერთმა ადგილობრივმა მიმართა და განაცხადა, რომ ბაზარში უცნაური, შესაძლოა, ადამიანის ხორცი შეიძინა.

კანიბალები 25 მარტს ერთ-ერთ კერძო სახლში დააკავეს, სადაც ისინი, საკვებად გამზადებულ ადამიანის ხორცს მაცივარში ინახავდნენ.

მათ არაფრის უარყოფა არ უცდიათ და უამბეს გამოძიებას, როგორ მოკლეს მეგობარი სმის დროს, როცა „ზაკუსკა“ შემოაკლდათ. ხორცის ნაწილი მიირთვეს, დანარჩენი კი 22 მარტს ბაზარში გასაყიდად წაიღეს.

მყიდველმა, რომელმაც პოლიცია კანიბალების კვალზე დააყენა, ამბობს, რომ ხორცი იყიდა, როგორც ახალი ღორის ხორცი, თუმცა როცა მოამზადა, საშინელი სუნი და გემო აღმოაჩნდა. ამის შემდეგ მან  ხორცი შესამოწმებლად სპეციალისტს წაუღო, რომელმაც იეჭვა, რომ ეს საერთოდ არ იყო ცხოველის ხორცი და ადამიანისას უფრო ჰგავდა.
კანიბალების სახლში სამართალდამცველებმა მაცივარში შენახულ ადამიანის თავსაც მიაგნეს.

გასულ კვირას, რუსეთში, ეს, კანიბალების გამოვლენის ერთადერთი შემთხვევა არ ყოფილა. ორშაბათს ცნობილი გახდა კიდევ ერთი სკანდალური ისტორია. პენზის ოლქის პოლიცია ვარაუდობს, რომ დაკავებული ჰყავს სერიული მკვლელი-კაციჭამია. ეს ამბავი 8-ათასიან ქალაქ ბელინსკში მოხდა. დაკავებული - 23 წლის ალექსანდრ ბიჩკოვი ეჭვმიტანილია 6 მკვლელობაში, რომლის გამოც, სასჯელს, შესაძლოა, სრულიად სხვა ადამიანი იხდის - ბავშვობიდან ინვალიდი ალექსანდრ ჟუპლოვი.

როგორც სამართალდამცველები ამბობენ, გამომძიებლები დამნაშავის კვალზე სრულიად შემთხვევით გავიდნენ. ისინი ადგილობრივი სამეურნეო მაღაზიის ქურდობის ფაქტს იძიებდნენ, რის გამოც დააკავეს ბიჩკოვი. დაკითხვის დროს კი მან საშინელი ისტორიების თხრობა დაიწყო, - მოყვა გვამების შესახებ, რომლებსაც სახლთან ახლომდებარე ხრამში მარხავდა.  საგამოძიებო კომიტეტის რეგიონალურ განყოფილებაში ამბობენ, რომ დააკავეს სერიული მკვლელი, რომელმაც აღიარა დანაშაულები.

გასულ წელს რუსეთში დიდი რეზონანსი გამოიწვია ნიკოლაი შადრინის საქმემ. კანიბალიზმში ეჭვმიტანილი მოსკოვში მას შემდეგ დააკავეს, რაც ქალაქში ადამიანის სხეულის ნაწილები აღმოაჩინეს. გვამების დათვალირების შემდეგ კი დადგინდა, რომ სხეულის ზოგიერთი ნაწილი არ ფიგურირებდა. სამაგიეროდ, დაკავებულის სახლში, საყინულეში იპოვეს ღვიძლი, თავად შადრინიც, იმ დროს, მოკლულის ღვიძლისგან დამზადებულ კერძს მიირთმევდა.

ეს დანაშაულიც შემთხვევით გაიხსნა. მის შესახებ პოლიციას სანტექნიკმა შეატყობინა, რომელიც მილებს წმენდდა და შოკში ჩავარდა, როცა მილში გაჭედილი ხორცი აღმოაჩინა. კანიბალმა აღიარა, რომ მოკლა ახლობელი, დაჭრა მისი ხორცი, ზოგიერთი ნაწილი სახლში დაიტოვა, დანარჩენი კი ქალაქის სხვადასხვა რაიონში მიმოფანტა.

0

ავტორი: