09:36:21 28-03-2012
სომხეთის გენერალური შტაბის უფროსის ვიზიტი
საქართველოში ოფიციალური ვიზიტით სომხეთის შეიარაღებული ძალების გენერალური შტაბის უფროსი გენერალ-პოლკოვნიკი იური ხაჩატუროვი იმყოფება. სომხეთის დელეგაცია დღეს საქართველოს შეიარაღებული ძალების გაერთიანებული შტაბის უფროსმა, გენერალ-მაიორმა დევი ჭანკოტაძემ მიიღო. შეხვედრაზე მხარეებმა თავდაცვის სფეროში მიმდინარე რეფორმები, სამხედრო განათლების საკითხები და ორმხრივი თანამშრომლობის განვითარების პერსპექტივები განიხილეს. საუბარი შეეხო სამშვიდობო ოპერაციებში მონაწილეობას და ამ მიმართულებით გამოცდილების გაზიარებას.
შეხვედრის შემდეგ სომხეთის შეიარაღებული ძალების გენერალური შტაბის უფროსი გორში გაემგზავრა და ეროვნული თავდაცვის აკადემია დაათვალიერა. დღესვე გენერალ-პოლკოვნიკმა იური ხაჩატუროვმა გმირთა მოედანზე გვირგვინით შეამკო საქართველოს ერთიანობისთვის დაღუპულ გმირთა მემორიალი და პატივი მიაგო მათ ხსოვნას.
ვიზიტის ფარგლებში სომხეთის დელეგაცია ხვალ ეროვნულ სასწავლო ცენტრ ”კრწანისს” ესტუმრება. ოფიციალური ვიზიტი 28 მარტს დასრულდება.
mod.gov.ge
0