13:15:41 10-03-2012
ტორონტოს პოლიციამ დაადასტურა, რომ იანგის ხევში ქართველი გოგონას ცხედარი აღმოაჩინეს
დღეს, კანადის პოლიციამ საგანგებო პრესკონფერენცია გამართა, სადაც გამომძიებელმა განაცხადა, რომ ექსპერტიზის შედეგად დადგინდა, იანგის ხევში აღმოჩენილი ცხედრის ვინაობა. ეჭვები გამართლდა, ორი დღის წინ, იანგის ხევში 17 წლის ქართველი გოგონას, მარიამ მახნიაშვილის ცხედარი იქნა ნაპოვნი.
მარიამ მახნიაშვილი ხევში 16 მეტრიდან გადავარდა, დაცემის დროს სავარაუდოდ იგი ცოცხალი იყო, არ განიხილება მკვლელობა ან საეჭვო გარდაცვალება, განაცხადა გამომძიებელმა, თუმცა ორი დღის წინ კანადის ყველა ტელეარხი საუბრობდა, რომ იანგის ხევში სასტიკად ნაწამები ქალის ცხედარი იპოვეს.
მარიამ მახნიაშვილი 2009 წლის 14 ოქტომბერს გაუჩინარდა. იგი, მშობლებთან და ძმასთან ერთად საცხოვრებლად 2008 წელს გადავიდა ტორონტოში. 2009 წლის 14 ოქტომბერს, მარიამ მახნიაშვილი უმცროს ძმასთან ერთად "ფორესთ ჰილის" სკოლაში მივიდა, ძმას უთხრა, რომ სკოლაში სხვა შესასვლელიდან შევიდოდა. ამის შემდეგ მახნიაშვილი ოჯახის წევრებს აღარ უნახავთ. ტორონტოს პოლიციამ მისი ძებნის ღონისძიება მაშინვე დაიწყო, დათვალიერდა მიმდებარე ტერიტორია, დაიკითხნენ თვითმხილველები, თუმცა მახნიაშვილის ძებნა უშედეგოდ დასრულდა.
მოგვიანებით, გავრცელდა ინფორმაცია, რომ მარიამ მახნიაშვილი 14 ოქტომბერს, გაუჩინარების დღეს, "მაკდონალდსში", 50 წლის მამაკაცთან ერთად ნახეს. ასევე ვრცელდებოდა ინფორმაცია, რომ გოგონა ოკოტოკსში ნახეს, როდესაც ტურისტებს ინდიელების ტრადიციულ სუვენირებს სთავაზობდა.
მახნიაშვილის გაუჩინარების შემდეგ, პოლიციამ დააკავა მარიამის მამა, მას ბრალად ახალგაზრდის დაჭრა ედებოდა. მოგვიანებით კი, იგი მეზობელს დაესხა თავს და მისი დაჭრაც სცადა, რისთვისაც ექვსი წლით თავისუფლების აღკვეთა მიესაჯა. მარიამ მახნიაშილის დედა ამ ინციდენტებს მისი შვილის გაუჩინარებას უკავშირებდა.
0