09:40:57     27-12-2011
კრემლს საქართველოსთან „მცირე, გამარჯვების მომტანი ომი“ სჭირდება

უახლოესი რამდენიმე წლის პერსპექტივაში, მოსკოვი ჩრდილო კავკასიაში დასუსტდება, მათ შორის იმ დონემდე, რომ რეგიონიდან მისი გასვლის საკითხი დადგება. რეალურად, ეს შეიძლება მოხდეს 10-15 წლის პერიოდში - წერს პოლიტოლოგი და „აღმოსავლური პარტნიორობის ინსტიტუტის“ პრეზიდენტი აბრამ შმულევიჩი. აღნიშნული ინსტიტუტი ეროვნებათაშორის ურთიერთობებს სწავლობს, მათ შორის, ჩრდილოეთ კავკასიისა და რუსეთის კონტექსტში. მიმოხილვა კავკასიის თითქმის ყველა პრობლემურ საკითხსა და რესპუბლიკას ეხება, მათ შორის, ჩერქეზთა თემასაც, რომელიც პოლიტოლოგის აზრით, რუსეთისათვის, ოლიმპიადის წინ, ნაღმის ფუნქციის მატარებელია. თუმცა ამ შემთხვევაში მის მოსაზრებებს, უშუალოდ, საქართველოსთან მიმართებაში არსებულ პრობლემატიკასთან დაკავშირებით გთავაზობთ.
შმულევიჩისთვის სრულებითაც არაა არარეალური რუსეთის ჩრდილო კავკასიიდან სრული ან ნაწილობრივ გასვლა, მაგრამ მისი აზრით, ასეთ შემთხვევაში აფხაზეთი ის უმნიშვნელოვანესი ბლოკ-პოსტი იქნება, რომლის შესანარჩუნებლად კრემლი ყველა მის ხელთ არსებულ ძალას გამოიყენებს, რადგანაც მოსკოვისთვის მნიშვნელოვანია „სამხედრო ყოფნა“ აფხაზეთში.
ასეთი პერსპექტივის გათვალისწინებით, შმულევიჩის თქმით, აფხაზური ხელისუფლების პოლიტიკური დამოუკიდებლობა მოსკოვის მიერ კიდევ უფრო შეიზღუდება. კურსი აღებული იქნება აფხაზური დამოუკიდებლობის ფაქტობრივ ლიკვიდაციაზე ან მოხდება ისე, რომ შექმნიან რაღაც ასოცირებულ, ფორმალურ სახელმწიფოთაშორის წარმონაქმნს, რაც ყველაზე უფრო სავარაუდოა, ანდაც, აფხაზეთს რუსეთის ჩვეულებრივ გუბერნიად გადააქცევენ - წერს პოლტოლოგი.
მისივე თქმით, თუ ამ მომენტისთვის საქართველოს ხელისუფლება სტაბილური აღმოჩნდება, ეკონომიკური ვითარება და ეკონომიკური ზრდა საქართველოში უკეთესი იქნება, ვიდრე რუსეთში. და თუ ქართველები შეძლებენ განაგრძონ აფხაზებისთვის მისაღები პოლიტიკა, ანუ დაარწმუნონ აფხაზები და შესთავაზონ მათ საქართველოსთან ინტეგრაციის მისაღები ვარიანტი, მაშინ შმულევიჩის აზრით, შესაძლებელია „აფხაზეთის შეიარაღებული გამოსვლა რუსული ბაზების ევაკუაციის შესახებ.“
პოლიტოლოგის აზრით, რეალურია საქართველოზე რუსეთის თავდასხმის საშიშროებაც. მისი თქმით, „სააკაშვილის რეჟიმის ჩამოგდება მოსკოვის მიერ სტრატეგიულ მიზნადაა გამოცხადებული. ოფიციალური პროპაგანდა სააკაშვილისგან მტრის ხატს ქმნის. რეჟიმი მოსკოვში სიძნელებს განიცდის, არანაირი შიდა წარმატებები არ არსებობს, ცხოვრების დონე ეცემა, ხდება მართვის სისტემის ტოტალური შლა, კორუფციის დონე მხოლოდ მატულობს, ხოლო რუსეთის ხელუსფლებას აქვს კრიზისიდან გამოსვლის ძველი რეცეპტი: „მცირე, გამარჯვების მომტანი ომი“ - წერს პოლიტოლოგი.
მისი პროგნოზით, რუსული პროპაგანდა და დიპლომატია ასეთ სცენარს შესთავაზებს დასავლეთს: თითქოს რუსეთი დაშლის ზღვარზეა და შედარებით პროდასავლური და ზომერი დღევანელი მმართველების ნაცვლად, ხელისუფლებაში მოსასვლელად საშინელი ანტიდასავლური ძალები - რუსი ნაციონალ-ფაშისტები ემზადებიან, ანდაც, იტყვიან, რომ საერთოდ, ქვეყანას ანარქია ემუქრება. ასეთ შემთხვევაში კი რეჟიმის გამყარების ერთადერთი საშუალება „მცირე, გამარჯვების მომტანი ომი“ იქნება. ამ ომზე შმულევიჩი სწორედ რუსეთ-საქართველოს ურთიერთობებისადმი მიძღვნილ თავში საუბრობს და იმასაც ამბობს, რომ საქართველოს ამჟამინდელი დამოკიდებულებები რუსეთის მიმართ არ შეიძლება იყოს ახალი ომის დაწყების მიზეზი, უფრო სწორედ, ის ფაქტობრივად, მიიჩნევს, რომ საქართველოს ახლანდელი მიდგომა რუსეთისადმი აბსოლუტურად სწორია, რადგან „რაც უფრო რბილად მოიქცევა საქართველო კრემლთან მიმართებაში, უფრო დიდია ალბათობა იმისა, რომ კრემლი ომზე წავა“ - წერს ის.
რაც შეეხება საქართველოსადმი დასავლეთის მხარდაჭერას, პოლიტოლოგის აზრით, ეს მხარდაჭერა ეფექტური იქნება, თუკი საქართველო შეძლებს დასავლეთს შესთავაზოს ის გეოპოლიტიკური პროექტი, რომელშიც მას, სამხრეთ და ჩრდილოეთ კავკასიაში თავისუფალი სამყაროს ინტერესების გამტარებლისა და წესრიგის დამცველის როლი ექნება დაკისრებული. თუ დასავლეთი ჩათვლის, რომ საქართველო მნიშვნელოვანია მისთვის მთლიანად კავკასიის რეგიონში, რუსეთს არ მისცემენ მასზე თავდასხმის ნებას - აცხადებს შმულევიჩი.
0