• თბილისი
  • 8°C
  • 15 დეკემბერი, 2018
article

„ადგილი მომავლის გარეშე“ – პროექტის ანგარიში

საერთაშორისო არასამთავრობო ორგანიზაცია Truth Hounds-მა „ჯეპრას“ საკონფერენციო დარბაზში პროექტ „No Future Land“-ის საბოლოო ანგარიში წარადგინა.

Truth Hounds-მა პროექტი აზერბაიჯანში ნორვეგიის საელჩოს ფინანსური მხარდაჭერითა და Inteational Partnership for Human Rights-თან თანამშრომლობით განახორციელა.

პრეზენტაციას არასამთავრობო ორგანიზაციის ხელმძღვანელი სვიტლანა ვალკო უძღვებოდა.

ანგარიში ოკუპირებული აფხაზეთის ტერიტორიაზე, კონკრეტულად კი გალის რაიონში მცხოვრები ბავშვების ისეთ უფლებათა დარღვევებზეა კონცენტრირებული, როგორიცაა ჯანმრთელობა, განათლება და თავისუფლად გადაადგილების უფლება. ეს ის პრობლემებია, რომლებთან გამკლავებაც ოკუპირებულ ტერიტორიებზე მცხოვრებ ბავშვებს უწევთ. პროექტის ფარგლებში გალში მცხოვრები ბავშვების შესახებ მომზადდა დოკუმენტური ფილმი, სადაც აღწერილია მათი ცხოვრებისეული სირთულეები, რომელთაც ყოველდღიურად აწყდებიან იქ მცხოვრები მოსწავლეები.

სვიტლანა ვალკოს თქმით, ორგანიზაციას ურთიერთობა ჰქონდა გალში მცხოვრებ მოსწავლეებთან და გაირკვა, რომ ჯანმრთელობის უფლება მათთვის შეზღუდულია. იქ მცხოვრებ მოსახლეობას არ აქვს ჯანდაცვის ხარისხიან სერვისზე წვდომის შესაძლებლობა, რის გამოც ცდილობს, სამკურნალოდ ქუთაისსა და თბილისში გადავიდეს. „ბოლო 3 წლის განმავლობაში სასწრაფო დახმარების მანქანებსაც აეკრძალათ ენგურის ხიდზე გადმოსვლა. ამიტომ დახმარების საჭიროების მქონე პირებს, მათ მშობლებსა და მანქანის მძღოლს უწევთ ნებართვის აღება, რასაც დიდი დრო სჭირდება. შესაბამისად, ვიღებთ ცუდ შედეგს, მაგალითად, 12 წლის ბიჭი დაიღუპა იმის გამო, რომ ენგური ვერ გადმოლახა“, – თქვა ვალკომ.

ანგარიშის მეორე თემა იყო განათლების პრობლემა. აღინიშნა, რომ გალში მცხოვრებ მოსწავლეებს არ შეუძლიათ განათლების მიღება მშობლიურ ენაზე და ისინი იძულებული არიან, რუსულად ან აფხაზურად ისწავლონ. გარდა ამისა, ბავშვებს შესვენებებზეც კი ეკრძალებათ ქართულად საუბარი. მიუხედავად ამისა, იქაური ქართველი მასწავლებლები ცდილობენ, ჩუმად ასწავლონ ქართული ენა და ლიტერატურა. მშობლიურ ენაზე განათლების მიღების უფლება დარღვეული აქვს 5000 მოსწავლესა და 750 მასწავლებელს.

ერთ-ერთი მწვავე პრობლემა, რომელზეც სვიტლანა ვალკომ ისაუბრა, იყო თავისუფლად გადაადგილების უფლება, რაც გულისხმობს საზღვრის გადაკვეთას სხვადასხვა მიზეზის გამო. „ბოლო მონაცემებით, 21 არასრულწოვანი დააკავეს ენგურზე მდინარის გადაცურვის გამო და ოლატორში გადაიყვანეს. მათ მხოლოდ მას შემდეგ გაათავისუფლებენ, რაც მშობლები შესაბამის თანხა გადაიხდიან. მათ, ვისაც არ აქვთ დოკუმენტაცია, ჩაკეტილ სივრცეში უწევთ ცხოვრება“, – აღნიშნა ორგანიზაციის ხელმძღვანელმა.

ოკუპირებულ ტერიტორიაზე მცხოვრები ბავშვების შესახებ ფილმის ჩვენება 22 ნოემბერს, 19:00 საათზე, Frontline Georgia-ში გაიმართება.


თეგები :