"ხვალ ჩვენ ოფიციალურად გავაფორმებთ ყველა ამ გადაწყვეტილებას. ამ სიტუაციიდან უკრაინა უფრო ძლიერი უნდა გამოვიდეს, რუსეთს კი გაურთულდება"
"პირველი: მე განვსაზღვრე, რომ უკრაინის შეიარაღებული ძალების ახალი მთავარსარდალი გახდება მიხაილო დრაპატი. მასთან ერთად ევგენ ხმარამ და პავლო პალისამ განსაზღვრეს, როგორი უნდა იყოს შეიარაღებული ძალების გენერალური შტაბის განახლებული კონფიგურაცია.
მადლიერება ოლექსანდრ სირსკის: ფაქტია, რომ ოლექსანდრ სირსკიმ უზრუნველყო უკრაინისთვის მნიშვნელოვანი შედეგები კიევის დაცვისას, ხარკოვის შეტევით ოპერაციებში და კურსკის ოპერაციაში. მნიშვნელოვანი გზაა განვლილი და უკრაინის დაცვა გრძელდება. საჭიროა ღირსეული დამოკიდებულება თითოეული მეომრის მიმართ. მადლობელი ვარ ოლექსანდრ სირსკის და თითოეული ჩვენი მეომრის უკრაინის ძლიერი პოზიციებისთვის ფრონტზე. მადლობელი ვარ მიხაილო დრაპატის სწორედ ასეთი ხედვისთვის. დღეს ოლექსანდრ სირსკისთან და ანდრიი გნატოვთან ერთად ვისაუბრეთ სამსახურის შემდგომ ფორმატებსა და საქმეების სწორად გადაბარებაზე.
მეორე: მიხაილო დრაპატისთან ერთად განვსაზღვრეთ, რა ამოცანები უნდა შესრულდეს უახლოეს მომავალში და საშუალოვადიან პერსპექტივაში. უკრაინის თავდაცვის ძალების ოპერაციები გრძელდება და ისინი სტაბილურად უნდა მიმდინარეობდეს. უკრაინის შორსმსროლელი იარაღის გეგმა და ჩვენი დრონების პროგრამა აბსოლუტურად მკაფიოდ უნდა შესრულდეს.
მესამე: მაქსიმალურად შეთანხმებულად და ინსტიტუციურად უნდა გადაიცეს ყველა საქმე არმიაში, რათა გაგრძელდეს დაგეგმილი ნაბიჯები საბრძოლო ოპერაციებში.
მეოთხე: მიხაილო დრაპატიმ, ევგენ ხმარამ და სხვა მეთაურებმა (რომლებსაც ერთად განვსაზღვრავთ), უნდა მოამზადონ და წარადგინონ დასამტკიცებლად ჩვენი თავდაცვის განახლებული სტრატეგია. ეს მოიცავს: კორპუსული სისტემის რეფორმის გაგრძელებას, საბრძოლო მეთაურების მოთხოვნების შესრულებას იარაღის, დრონების და აღჭურვილობის მიწოდებაზე (რაც ამ დღეებში გაჟღერდა შტაბში და მეთაურებთან პირდაპირი კომუნიკაციისას). პრიორიტეტია ცის მაქსიმალურად დახურვა რუსული დარტყმებისგან და მობილიზაციის პროცესის რეალური ხედვის წარმოდგენა.
მეხუთე: დღეს მქონდა შეხვედრა მიხაილო ფედოროვთან. მე მას შევთავაზე ღირსეული პოზიცია ხელისუფლებაში, რომელიც საშუალებას მოგვცემს გავაერთიანოთ ჩვენი სახელმწიფოს ტექნოლოგიური კომპონენტი და უზრუნველვყოთ მისი განვითარება. ევგენ ხმარას უსაფრთხოების კომპეტენცია, საბრძოლო მიღწევები, ტექნოლოგიური შედეგები და ქვედანაყოფ "ალფას" ღრმა დარტყმები თავისთავად მეტყველებს. სამთავრობო სტრუქტურების სისტემის პირობებში ეს აუცილებელია.
სურვილი ყველას ერთი გვაქვს - მტერზე გამარჯვება, ფრონტზე ისეთი პირობების მიღწევა და რუსეთზე ისეთი ზეწოლა, რაც საშუალებას მოგვცემს ვაიძულოთ მშვიდობისკენ.
ხვალ ჩვენ ოფიციალურად გავაფორმებთ ყველა ამ გადაწყვეტილებას. ამ სიტუაციიდან უკრაინა უფრო ძლიერი უნდა გამოვიდეს, რუსეთს კი გაურთულდება.
მადლობა ჩვენს ყველა მეომარს, მადლობა თითოეულ შედეგიან ქვედანაყოფს. მადლობა ყველას, ვინც ზრუნავს ჩვენს სახელმწიფოზე, ვინც ზრუნავს ჩვენს ეროვნულ ინტერესებზე ისე, როგორც საკუთარზე“ - ამბობს ვოლოდიმირ ზელენსკი ვიდეომიმართვაში.
