"ჰამასი" აცხადებს, რომ ისრაელმა მათი პოლიტიკური ლიდერი, ისმაილ ჰანიე თეირანში მოკლა

"ჰამასის" პოლიტიკური ლიდერი, ისმაილ ჰანიე ირანის დედაქალაქ თეირანში მოკლეს. ამის შესახებ ინფორმაციას CNN-ი ირანის რევოლუციური გვარდიის კორპუსისა და "ჰამასის" განცხადებებზე დაყრდნობით ავრცელებს. 

ჰანიე თეირანში მისი რეზიდენციის "დარბევის" დროს მოკლეს. დაჯგუფება მკვლელობაში ისრაელს ადანაშაულებს. "ჰამასის" პოლიტბიუროს წევრმა მუსა აბუ მარზუკმა თქვა, რომ ეს იყო "მშიშარა საქციელი", რომელიც "უპასუხოდ არ დარჩება".

ირანის რევოლუციური გვარდიის კორპუსმა განაცხადა, რომ "ინციდენტის" მიზეზი დაუყოვნებლივ არ არის ნათელი, მაგრამ მიმდინარეობს "გამოძიება", ინფორმაციას სააგენტო AFP ავრცელებს. ჯგუფის ცნობით, ჰანიე დაიღუპა ირანის ახალი პრეზიდენტის მასუდ ფეზეშქიანის ინაუგურაციის ცერემონიაში მონაწილეობის შემდეგ, რომელმაც სამშაბათს ფიცი დადო.

ისრაელს ჯერ საპასუხო განცხადება არ გაუვრცელებია.