მამაკაცი, რომელმაც ხაშურში ცოლი დაჭრა, დაკავებულია

შინაგან საქმეთა სამინისტრომ მამაკაცი, რომელმაც ხაშურში ცოლი დაჭრა, უკვე დააკავა.

შსს-ს ცნობით, სისხლის სამართლის საქმე ოჯახის წევრის მიმართ დამამძიმებელ გარემოებაში განზრახ მკვლელობის მცდელობის მუხლით დაიწყო, რაც 13-დან 17 წლამდე პატიმრობას გულისხმობს.

დაკავებული მამაკაცი ჩადენილ დანაშაულს აღიარებს. ამოღებულია დანაშაულის ჩადენის იარაღი - დანა.

ხაშურის საავადმყოფოში სხეულის მრავლობითი დაზიანებებით 33 წლის ქალი გუშინ შეიყვანეს. ექიმების განცხადებით, პაციენტს ბასრი საგნით მიყენებული 7 ჭრილობა აღენიშნება. ახალგაზრდა ქალს დაზიანებული აქვს რამდენიმე ორგანო. დაჭრილის მდგომარეობა მძიმეა.

ქალი ხაშურში, სილამაზის სალონში მუშაობს. ქმარი მას სწორედ იქ დაესხა თავს.