ვუდი ალენმა ახალი ფილმის მსახიობები დაასახელა
10:37:14 22-06-2011
ვუდი ალენმა იმ მსახიობების სია გამოაქვეყნა, რომლებიც მის ახალ ფილმში „The Bop Decameron“ ითამაშებენ. ამის შესახებ საიტი „Collider“ იუწყება.
კინოსურათში მთავარ როლს თავად ალენი შეასრულებს, ფილმში ასევე მონაწილეობას მიიღებენ ელენ პეიჯი, ალეკ ბოლდუინი, პენელოპა კრუსი, რობერტო ბენინი, ჯესი აიზენბერგი, ჯუდი დევისი და გრეტა გერვიგი. ახალი ფილმის გადაღებების დაწყებას, ალენი 2011 წლის 11 ივლისს, რომში გეგმავს. კინოსურათს იტალიური კომპანია „Medusa Film“ აფინანსებს.
ამ დროისათვის, ვუდი ალენის ჯერჯერობით უკანასკნელი ფილმი, „შუაღამე პარიზშია“. კინოსურათის მსოფლიო პრემიერა 2011 წლის 11 მაისს, კანის კინოფესტივალის ფარგლებში შედგა და კინოკრიტიკოსების მოწონება დაიმსახურა.