სირიამ ამბოხებულ ქალაქებში ჯარი შეიყვანა
10:38:16 27-04-2011
სირიის ქალაქ დუმაში ორი ათასზე მეტი სამხედრო შეიყვანეს. ამის შესახებ “როიტერი” იტყობინება. ქალაქში ასევე ტყვიამფრქვევები და სხვადასხვა სამხედრო ტექნიკა გამოჩნდა. ქუჩებში ავტომატიანი ჯარისკაცები გადაადგილდებიან.
ორშაბათს ღამით, როგორც ცნობილია, სირიელი სამხედროები ტანკებით, ქალაქ დერაში შევიდნენ. ადგილობრივების მონაყოლით, დილით სნაიპერებმა სახელისუფლო შენობების სახურავები დაიკავეს და სახლებთან მცხოვრებლებს ესროდნენ, რათა მათთვის ფანჯრებთან მიახლოების საშუალება არ მიეცათ. ამ დროისათვის, ქალაქში სროლები გრძელდება.
დღეს დილით გავრცელდა ინფორმაცია იმის შესახებ, რომ სირიელი სამხედროები და სპეცსამსახურები ქალაქ ბანიასზე შეტევას გეგმავენ. ქალაქი ქვეყნის დასავლეთ სანაპიროზე მდეობარეობს. სირიის ოპოზიციის წარმომადგენელთა განცხადებით, შავ ტანსაცმელში გამოწყობილი ძალოვნები, АК-47 – ებით, ქალაქის მისადგომებთან გამოჩნდნენ. იქვე შეინიშნებოდა ჯავშანტექნიკის გადაადგილება.