2 ბოთლ ლუდში გამორთმეული 4 000-მდე ლარი - დაკავებულია კლუბის დაცვის თანამშრომელი

ლესელიძეზე მდებარე ერთ-ერთი ღამის კლუბის დაცვის თანამშრომელი დაკავებულია.  ძარცვის მუხლით გამოძიების დაწყების მიზეზი ტურისტების განცხადება გახდა. მათი მტკიცებით, 2 ბოთლ ლუდში კლუბში მათ 4 ათას ლარამდე თანხა გადაახდევინეს. 

დაკავებული თანამშრომლის ადვოკატის ინფორმაციით, წაყენებულ ბრალდებას მისი დაცვის ქვეშ მყოფი უარყოფს. 

გვიან ღამემდე გაგრძელდა ძველი თბილისის პოლიციის სამმართველოს პირველ განყოფილებაში 3 დაზარალებული ინდოელი ტურისტის დაკითხვა. გაიმართა ამოცნობის პროცედურა. სავარაუდოდ, გამოიკითხნენ ობიექტში დასაქმებული სხვა პირებიც.

ინდოელი ტურისტები დაწყებული გამოძიებით კმაყოფილნი არიან.