“ბითლზების” ძველი სიმღერები იგი პოპის ახალ ალბომში

ჯგუფ “The Stooges” – ის ლიდერი იგი პოპი ახალი სოლო ალბომის გამოცემას გეგმავს. ამის შესახებ მომღერალმა “Billboard” – თან ინტერვიუში განაცხადა.

ფირფიტას, ჯერჯერობით, არც სახელი აქვს, არც გამოსვლის თარიღია დაკონკრეტებული, მაგრამ უკვე ირკვევა, რომ მასში ცნობილი ინგლისური და ფრანგული სიმღერების ქავერ ვერსიები შევა. ალბომში, სხვადასხვა შემსრულებლების კომპოზიციებთან ერთად, საპატიო ადგილს “ბითლზის” რეპერტუარიც დაიკავებს.

მსგავსი ალბომი იგი პოპმა 2009 წლის ივნისშიც გამოუშვა. მასში, ძირითადად, ძველი, ფრანგულენოვანი სიმღერები შევიდა. ცნობილი ხდება, რომ ახალი ფირფიტის პროდიუსერი ჰელ კრეგინი იქნება, რომელიც მომღერლის ძველ ალბომზეც მუშაობდა. პოპის თქმით, დისკი უკვე თითქმის ჩაწერილია და გაყიდვაში შობის შემდეგ, 2011 წლის იანვარში გამოვა.

იანვრიდან კი მუსიკოსი “The Stooges” – ის ახალი ალბომის ჩაწერაზე იწყებს მუშაობას. საამისოდ, იგი პოპმა და გიტარისტმა ჯეიმს უილსონმა უკვე შექმნეს რვა კომპოზიცია.