ბრალდებული თურქი სამხედროები პატიმრობაში რჩებიან

თურქეთის უმაღლესმა სასამართლომ კიდევ ერთხელ უარი განაცხადა იმ 186 მოქმედი და გადამდგარი სამხედრო მოსამსახურის გათავისუფლებაზე, რომლებიც თებერვალში, სახელმწიფო გადატრიალების ბრალდებით დააპატიმრეს.

ადვოკატებმა, დაპატიმრებულთა შეწყალების თხოვნით, სასამართლოს მიმართეს, თუმცა უშედეგოდ. როგორც ცნობილია, ერდოგანის ხელისუფლების გადატრიალების მცდელობაში მხილებულების მიმართ საქმე პროკურატურამ 2010 წლის იანვარში, გაზეთებში გამოქვეყნებული სკანდალური მასალების შემდეგ აღძრა.

მასალების მიხედვით, თურქეთის არმიამ, რომელმაც 1960 წლის შემდეგ სამჯერ განახორციელა გადატრიალება, სტამბულის მეჩეთების აფეთქების და სამხედრო მდგომარეობის გამოცხადების გეგმა მოამზადა, რასაც ხელისუფლების დამხობა უნდა მოჰყოლოდა.