თარგამაძის მანქანის აფეთქებისას დაშავებული მამაკაცის მდგომარეობა კვლავ მძიმეა

"ნაციონალური მოძრაობის" დეპუტატის გივი თარგამაძის მკვლელობის მცდელობის შედეგად დაშავებულ გამვლელთაგან ერთ-ერთის მდგომარება კვლავ მძიმეა.

მამაკაცი ინგოროყვას სახელობის კლინიკის რეანიმაციულ განყოფილებაში მართვით სუნთქვაზეა შეერთებული.

"მამაკაცის მდგომარეობა რჩება მძიმე, იმყოფება მართვით სუნთქვაზე, აღენიშნება სხეულის დამწვრობა, მრავლობითი ჭრილობები", - ამბობს მისი ექიმი.

დანარჩენი დაშავებულების მდგომარეობა, ექიმების თქმით, დამაკმაყოფილებელია.

შეგახსენებთ, 4 ოქტომბერს დეპუტატ გივი თარგამაძის მკვლელობა მანქანის აფეთქების გზით სცადეს. დეპუტატი გადარჩა, თუმცა, დაშავდნენ გამვლელები. გამოძიება სისხლის სამართლის კოდექსის 19-109-ე მუხლით დაიწყო, რაც დამამძიმებელ გარემოებაში განზრახ მკვლელობის მცდელობას გულისხმობს.