შვეიცარია – “ხაკისფერი” ქვეყანა

რომელია ყველაზე მილიტარიზებული სახელმწიფო მსოფლიოში? ამ კითხვაზე პასუხისას, უმრავლესობას ან ჩრდილოეთ კორეა, ან ისრაელი გაახსენდება. სინამდვილეში კი ასეთი სტატუსის მქონეა ქვეყანა, რომელსაც უკვე მრავალი წელია არავისთან უომია.

ევროპაში ასეთი მოსწრებული გამონათქვამი არსებობს: სოფლის აშენებისას, შვეიცარიელები ჯერ ტირს აწყობენ, მერე ბანკს და შემდეგ ეკლესიას. ქვეყანაში მოსახლეობის რაოდენობაზე, პროცენტულად ყველაზე მეტი ჯარისკაცი მოდის მსოფლიოში.

სხვადასხვა საინფორმაციო ინტერნეტ-საიტების ცნობების მიხედვით, აქ 20-დან 50 წლამდე ასაკის ყველა მამაკაცი სამხედრო მოსამსახურეა. შვეიცარიას ჰყავს ძალიან კარგად ორგანიზებული, განსწავლული, დისციპლინირებული და ძლიერი არმია, კარგად გაწვრთნილი რეზერვით. ადგილობრივი მთაგორიანი რელიეფი კი შესანიშნავი “მასალაა” წვრთნებისათვის.

კანონის მიხედვით, 32 წლამდე ჯარისკაცი იმყოფება “აუსცუგის” მდგომარეობაში, შემდეგ - “ლანდვერის” და ბოლოს – “ლანდშტურმის.” რიგითი “აუსცუგი” სამ კვირაში 8-ჯერ მიდის ნაწილში წვრთნებზე, “ლანდვერი” - ორ კვირაში სამჯერ, “ლანდშტურმი” კი ორ კვირაში ერთხელ.

51 წლიდან მამაკაცს ოფიციალურად ითხოვენ არმიიდან, თუმცა ტოტალური მობილიზაციის შემთხვევაში, გაწვევას ისინიც ექვემდებარებიან.