ჟურნალისტების მიერ ოკუპაციის წინააღმდეგ აქციი

ორჭოსანში ჟურნალისტების მიერ ოკუპაციის წინააღმდეგ აქციის გამართვას საპარლამენტო უმრავლესობის მხრიდან არაერთგვაროვანი შეფასებები მოჰყვა.

თამარ კორძაიას შეფასებით, ჟურნალისტებს აქციის გამართვას  კანონი არ უკრძალავს, თუმცა დეპუტატი აღნიშნავს, რომ მსგავსი პროტესტის დროს გათვალისწინებული უნდა იყოს, ის რისკებიც, რათა ამ ქმედებამ უფრო მავნე ზიანი არ მოიტანოს.

„აღნიშნულ აქციაში მონაწილეობა არის ჟურნალისტების უფლება და მათი რისკი, თუ როგორ შეფასდება საზოგადოების მხრიდან მათი საქმიანობა, მაგრამ ამ გამოხატვის თავისუფლებას ჟურნალისტებს კანონი არ უკრძალავს. შესაბამისად, თუ ამას არც ის მედიაორგანიზაციები არ უკრძალავენ, რომელშიც მუშაობენ, ჩვენ მითუმეტეს ჟურნალისტების საქმიანობასთან არანაირი შეხება არ გვაქვს. რაც შეეხება თვითონ ფაქტს, ვფიქრობ რომ თითოეული მოქალაქე მეტი პასუხისმგებლობით უნდა ეკიდებოდეს ამ საკითხს. ჩვენ რა თქმა უნდა პროტესტი უნდა გამოვხატოთ რუსეთის მიმართ,  რუსეთი არის ოკუპანტი ყველა მოქალაქე უნდა აპროტესტებდეს საკუთარი სახელმწიფოს მიმართ გამოხატულ აგრესიას, მაგრამ თითოეული ჩვენგანის პროტესტმა და მოქმედებამ, უფრო მავნე ზიანი არ უნდა მოიტანოს“.

ანი მიროტაძემ კი „პრესა.ჯი“-ს განუცხადა, რომ  ჟურნალისტების რეაქცია  აბსოლუტურად სწორი ნაბიჯი იყო.

„ყველა ადამიანს პროფესიის მიუხედავად აქვს უფლება გამოხატოს თავისი პოზიცია, ყველა ადამიანის ვალდებულებაა ქვეყნის ინტერესებისთვის იბრძოლოს. ქართველი ჟურნალისტების მხრიდან ოკუპაციის გაპროტესტება იყო აბსოლუტურად სწორი. მიმაჩნია, რომ აბსოლუტურად სწორად მოიქცნენ“.

"საერთაშორისო ზეწოლის ბერკეტები და სამოქალაქო აქტივობა - ვფიქრობ, ეს ორი რამ კარგად იმოქმედებს, მაგრამ სამოქალაქო საზოგადოების აქტივობა არ უნდა იწვევდეს მტრის პროვოცირებას“,- ეს შეფასება კი ზაქარია ქუცნაშვილს ეკუთვვნის.

მისი თქმით,  ჟურნალისტების აქცია არ შეუწყობს რუსული მხარის პროვოცირებას ხელს.

საპარლამენტო უმრავლესობის წევრის მანანა კობახიძის განცხადებით, კი ჟურნალისტების მიერ ორჭოსანში ჩატარებული აქცია გარკვეული პოლიტიკური ძალის მიერ იყო ანგაჟირებული.

„ეს არის პროვოკაცია, ის გათვლილია იმაზე, რომ საქართველოს მთავრობა ამაზე წამოეგოს და ურთიერთობის დაძაბვა  მოხდეს. ამიტომ, ჩვენ ძალიან დიდი სიფრთხილით უნდა მოვეკიდოთ ამ ფაქტს, უნდა შევეცადოთ, რომ მხოლოდ სიფრთხილით, პრაგმატული ნაბიჯებით ვუპასუხოთ ამ გამოწვევებს. აგრესიული პასუხები წინა ხელისუფლების მხრიდან გვახსოვს. მან ათეულობით სოფლები დამატებით დაგვაკარგვინა, სწორედ იმიტომ, რომ რუსეთმა ეს პოლიტიკა თავის სასარგებლოდ გამოიყენა. ეს ძალიან მძიმე და მწარე გაკვეთილებია, რომელსაც გააზრება უნდა. ჟურნალისტების მიერ ბანერის მოხსნის ფაქტს რაც შეეხება,  ვფიქრობ, რომ ეს პოლიტიკური ჯგუფის დღის წესრიგში შედიოდა. რა თქმა უნდა, აზრის გამოხატვა ყველას კონსტიტუციური უფლებაა და კანონის შესაბამისია, მაგრამ როდესაც ამ ყველაფრის უკან, ფიქსირდებოდნენ პოლიტიკური პარტიის ლიდერები, ცხადია და აშკარაა ყველაფერი.  მე ყველა ჟურნალისტზე არ მაქვს საუბარი თუმცა სამწუხაროდ, არიან მედია საშუალებები და ჟურნალისტები, რომლებიც დაკვეთას პირდაპირ ასრულებენ და ეს რეალობაა“, - აცხადებს კობახიძე.