ყაჩაღური თავდასხმა 62 წლის ქალბატონზე - რა ხდება ზუგდიდში?

62 წლის გული მალაზონია, რომელიც დაუდგენელმა პირებმა გუშინ გაძარცვეს, კვლავ რეანიმაციულ განყოფილებაში რჩება. მედიკოსთა განცხადებით, მისი ჯანმრთელობის მდგომარეობა სტაბილურად მძიმეა.

ცნობისთვის, ძარცვა ზუგდიდის ცენტრში, ჭყონდიდელის ქუჩაზე მოხდა. მალაზონია ვალუტის გადამცვლელ ჯიხურში მუშაობდა. 

გული მალაზონია ერთადერთი არ არის ვისაც ზუგდიდში თანხა გასტაცეს. როგორც მალაზონიას კოლეგა ციცინო დანელია „პრესა.ჯი“-ს უყვება, გასული წლის 22 სექტემბერს მას ჩანთა იმ დროს წაართვეს, როდესაც სახლში ბრუნდებოდა.

მძარცველები მას ლიფტთან დახვდნენ და ელექტროშოკის გამოყენებით ხელჩანთა წაართვეს, სადაც დაზარალებულის მტკიცებით, 500 ლარი ედო.

ვალუტის გადამცვლელი ჯიხურის თანამშრომელი ქალბატონი ოლია ტავლოვის თქმით კი მას საკუთარ სახლთან თავს დაესხა უცნობი პირი.

შემთხვევა 2013 წელს მოხდა. მას თავში ბლაგვი საგანი ჩაარტყეს და ჩანთა წაართვეს რომელშიც 3000 დოლარი და 2000 ლარი იყო:

„თავს დაუცველად ვგრძნობთ, ძალიან გვეშინია, გამოყარეს ციხეეიდან ყაჩაღები რომლებიც მოგვადგნენ მშრომელ ხალხს“,- აცხადებენ ვალუტის გადამცვლელ პუნქტებში დასაქმებული ქალბატონები.