პროკურატურის განცხადება ალექსი ბატიაშვილის დაკითხვასთან დაკავშირებით
13:43:13 04-11-2014
საქართველოს მთავარ პროკურატურაში აცხადებენ, რომ თავადცვის მინისტრის მოადგილეს არ აღმოაჩნდა პასუხები დასმულ კითხვებზე.
უწყების მიერ გავრცელებულ განცხადებაში ნათქვამია, რომ
მოწმე ბატიაშვილის ადვოკატის განცხადება დაკითხვის პროცესში დარღვევების შესახებ არის სრულიად გაუგებარი, მითუმეტეს თვითონვე ვერ მიუთითებს დარღვევის კონკრეტულ ფაქტებზე.
"2014 წლის 03 ნოემბერს, მთავარი პროკურატურის წარმოებაში არსებულ საქართველოს თავდაცვის სამინისტროს მაღალჩინოსნების მიერ სახელმწიფო ბიუჯეტის კუთვნილი 4 102 872 ლარის გაფლანგვის ფაქტზე მიმდინარე სისხლის სამართლის საქმეზე, მოწმის სახით, ადვოკატის მონაწილეობით დაიკითხა საქართველოს თავდაცვის მინისტრის მოადგილე ალექსი ბატიაშვილი.
დაკითხვა მიმდინარეობდა საქართველოს სისხლის სამართლის საპროცესო კანონმდებლობით განსაზღვრული მოწმის დაკითხვის ყველა პროცედურის დაცვით 8 საათის განმავლობაში, ვინაიდან გამოძიებას ჰქონდა ბევრი კითხვა ა.ბატიაშვილის მიმართ. თუმცა საბოლოოდ როგორც აღმოჩნდა ამ უკანასკნელს არ აღმოაჩნდა პასუხები დასმულ კითხვებზე. დაკითხვის დასრულებისას მოწმე ალექსი ბატიაშვილმა გამოიჩინა გაურკვეველი დამოკიდებულება და უარი განაცხადა მის მიერვე მიცემული ჩვენების საფუძველზე შედგენილი დაკითხვის ოქმის ხელმოწერაზე. გამომძიებელმა მას და მის ადვოკატს მისცა საშუალება დაეფიქსირებინათ დაკითხვის ოქმზე შენიშვნა ხელმოწერაზე უარის მიზეზების დასაფიქსირებლად, რის შემდეგაც მოხდა დაკითხვის პროცესის დასრულება, ვინაიდან იწურებოდა დაკითხვისთვის კანონით განსაზღვრული 8 საათიანი ვადა.
მიუხედავად ყოველივე ზემოაღნიშნულისა, სრულყოფილი და ობიექტური გამოძიების უზრუნველსაყოფად, საქართველოს მთავარი პროკურატურა მზადყოფნას გამოთქვამს, მოხდეს ალექსი ბატიაშვილის მოწმის სახით განმეორებით დაკითხვა, ამ შემთხვევაში ვფიქრობთ ის უფრო მომზადებული შეხვდება გამომძიებელს, ვინაიდან გამოძიების კითხვები მისთვის უკვე ცნობილია.
აქვე გამოძიება სთავაზობს მოწმე ალექსი ბატიაშვილს, მისი ახალი დაკითხვის პროცესის დაფიქსირება მოხდეს აუდიო-ვიდეო გადამღები საშუალებების გამოყენებით, რათა შემდგომში თავიდან იქნას არიდებული მსგავსი სპეკულაციები",- აღნიშნულია პროკურატურის განცხადებაში.
შეგახსენებთ, რომ თავდაცვის მინისტრის მოადგილემ, ალექსი ბატიაშვილმა, რომელსაც პროკურატურა თითქმის 10 საათის განმავლობაში მოწმის სტატუსით კითხავდა, დაკითხვის ოქმს ხელი არ მოაწერა.
ბატიაშვილის ადვოკატმა მედიას განუცხადა, რომ დაკითხვა დარღვევებით წარიმართა, ხოლო პროკურატურა მისთვის სასურველი პასუხების მიღებას ცდილობდა.
საკითხვის ოქმი კი არასრულფასოვნად ასახავდა დაკითხვის მიმდინარეობას.