შსს-ს ინფორმაციით, წარსულში ნასამართლევმა პირმა 72 წლის ქალბატონი მოკლა

თბილისში, ორხევში მცხოვრებ 72 წლის მაღაზიის გამყიდველს ყელი გამოჭრეს. შემთხვევა გუშინ საღამოს მოხდა.

გავრცელებული ინფორმაციით, 1942 წელს დაბადებული ლიანა ბ, პატრულის თანამშრომელმა დილით იპოვა.

მკვლელობაში ეჭვმიტანილი წარსულში ნასამართლევი ზაზა გ. პოლიციელებმა განზრახ მკვლელობის ბრალდებით ცხელ კვალზე დააკავეს.

შინაგან სამეთა სამინისტროს მიერ გავრცელებული განცხადების თანახმად: „შსს-ს თბილისის მთავარი სამმართველოს დეტექტივების სამმართველოს და ისანი-სამგორის სამმართველოს თანამშრომლებმა, ერთობლივად ჩატარებული ოპერატიულ-სამძებრო და საგამოძიებო ღონისძიებების შედეგად, 1983 წელს დაბადებული, წარსულში ნასამართლევი ზაზა გ. განზრახ მკვლელობის ბრალდებით დააკავეს.

გამოძიებამ დაადგინა, რომ ალკოჰოლის ზემოქმედების ქვეშ მყოფმა ბრალდებულმა, გვიან ღამით, ურთიერთშელაპარაკებისას, დანით სასიკვდილო ჭრილობა მიაყენა ორხევის დასახლებაში მდებარე ერთ-ერთი სავაჭრო ობიექტის გამყიდველს – 1942 წელს დაბადებულ ლიანა ბ-ს, რომელიც შემთხვევის ადგილზე გარდაიცვალა.

სამართალდამცველებმა, ცხელ კვალზე ჩატარებული ოპერატიული მოქმედებების შედეგად, ზაზა გ. მომხდარიდან რამდენიმე საათში თბილისში დააკავეს. დანაშაულის ჩადენის იარაღი – დანა ნივთმტკიცებად ამოიღეს.

ბრალდებული ჩადენილ დანაშაულს აღიარებს. გამოძიება განზრახ მკვლელობის ფაქტზე მიმდინარეობს (საქართველოს სსკ-ის 108-ე მუხლით)“.

ამ დრომდე უცნობია, შელაპარაკების მიზეზი. გარდაცვლილის ოჯახი, მედიასთან კომენტარს არ აკეთებს. გარდაცვლილის ოჯახის ახლობელები ამბობენ, რომ დაკავებული მოკლულის მეზობელია.