საქართველოს თავდაცვისა და უსაფრთხოების კონფერენცია
08:36:03 28-06-2012
28 ივნისს, სასტუმროში ”რადისონ ბლუ” (ბათუმი) საქართველოს თავდაცვისა და უსაფრთხოების კონფერენცია გაიხსნება (09:30 სთ.). კონფერენციის მონაწილეები ორი დღის განმავლობაში ისეთ მნიშვნელოვან საკითხებს განიხილავენ, როგორიცაა უსაფრთხოება ევროპასა და სამხრეთ კავკასიის რეგიონში, კიბერ უსაფრთხოება, ISAF-ის მისია და სამომავლო გეგმები, ნატო ჩიკაგოს სამიტის შემდეგ, ევროატლანტიკური უსაფრთხოება, მომავალი საფრთხეები და გამოწვევები.
კონფერენციაში მონაწილეობას მიიღებენ როგორც საქართველოს ეროვნული უსაფრთხოების სექტორის წარმომადგენლები, ასევე, პარტნიორი ქვეყნებიდან მოწვეული სტუმრები, სამთავრობო, არასამთავრობო და საერთაშორისო ორგანიზაციები.
კონფერენცია წარმოადგენს ერთის მხრივ თავდაცვის სამინისტროსა და სამოქალაქო საზოგადოებას შორის, ხოლო მეორეს მხრივ პარტნიორ ქვეყნებთან აზრთა გაზიარების და დიალოგის საუკეთესო შესაძლებლობას.
უკანასკნელი წლების განმავლობაში საქართველოს თავდაცვის კონფერენცია სამხრეთ კავკასიაში უსაფრთხოების პოლიტიკის ერთგვარ ფორუმად ჩამოყალიბდა. თავდაცვის სამინისტროს მიერ ორგანიზებული კონფერენცია წელიწადში ორჯერ იმართება.
29 ივნისს, კონფერენციას ნატოს გენერალური მდივნის მოადგილე ალექსანდრე ვერშბოუ შეუერთდება. ის შეხვედრას გამართავს საქართველოს თავდაცვის მინისტრთან ბაჩო ახალაიასთან. კონფერენციის პარალელურად მინისტრს უცხოელ სტუმრებთან ინდივიდუალური შეხვედრებიც ექნება.
mod.gov.ge